टुरिन (एजेन्सी) – युइएफए च्याम्पियन्स लिगमा आज राति इटालियन क्लब युभेन्टसले स्वीस क्लब योङ ब्वाइजसँग प्रतिस्पर्धा गर्दैछ । खेल युभेन्टसको  घरेलु मैदान एलियन्ज स्टेडियममा राति १०ः४० बजेपछि शुरु हुनेछ ।

समूह ‘एच’ अन्तर्गतको खेलमा युभेन्टस् ३ अंक जोडेर दोस्रो स्थानमा छ । अंक जोड्न नसकेको योङ ब्वाइज पुछारमा छ । यस्तोमा युभेन्टस् योङ ब्वाइजलाई पराजित गर्दै समूहमा लगतार दोस्रो जित निकाल्ने लक्ष्यमा हुनेछ । तर, युभेन्टस्सँग उसका स्टार खेलाडी क्रिस्टियानो रोनाल्डो हुने छैन । रोनाल्डो एक खेलको प्रतिबन्ध खेपिरहेका छन् । रोनाल्डोले च्याम्पियन्स लिग अन्तर्गत नै अघिल्लो साता भ्यालेन्सियाविरुद्धको खेलमा सोझै रातो कार्ड खाएको थियो ।

यस्तै तर, युभेन्टस्सँग रोनाल्डो नभएपनि अन्य स्टार खेलाडीहरुको बाहुल्यता रहेको छ । मारियो म्यान्जुकिक, पाउलो डिब्याला, जर्जियो चिलियानी, लियोनार्दाे बोनुची र एलेक्स सान्द्रो जस्ता स्टार खेलाडीको साथ रहेको छ । यस्तै भ्यालेन्सियाविरुद्धको खेलमा दुई गोल गरेका मिारलेम पिजानिक पनि युभेन्टस्सँग रहेको छ । इटालियन सिरी ‘ए’ मा उच्च प्रदर्शन गरिरहेको युभेन्टसले तुलनात्मक रुपमा कमजोर प्रतिद्धन्द्धी योङ ब्वाइजमाथि जित निकाल्न असहज हुनेछैन ।

यता, स्वीट्जरल्यान्डको योङ ब्वाइज आफ्नो दोस्रो खेलमा युभेन्टसलाई  स्तब्ध पार्दै समूहमा पलिो जितको खोजीमा मैदान उत्रनेछ । योङ ब्वाइज आफ्नो पहिलो खेलमा घरेलु मैदानमै ३–० ले पराजित भएको थियो । घरेलु मैदानमा इंग्लिस क्लब म्यानचेस्टर युनाइटेडसँग भोगेको हारको बदला युभेन्टस्विरुद्ध लिने योजनामा योङ ब्वाइज हुनेछ । योङ ब्वाइज घरेलु लिका पछिल्ला तीन खेलमा अपराजित छ ।

यो समूहको अर्काे खेलमा आज राति समूहको शीर्ष स्थानमा रहेको म्यानचेस्टर युनाइटेड र भ्योलेन्सियाबीच राति १२ः४५ बजे खेल हुनेछ । म्यानचेस्टर युनाइटेड लगातार दोस्रो जित निकाल्दै समूह चरण पार गर्ने योजनामा हुनेछ । यता, स्पेनिस क्लब भ्यालेन्सिया समूहमा पहिलो जितको खोजीमा हुनेछ ।