टुरीन (एजेन्सी) – स्टार फरवार्ड क्रिस्टियानो रोनाल्डो यस सिजन स्पेनिस क्लब रियल म्याड्रिड छाडेर इटालियन च्याम्पियन युभेन्ट्स आए । ३३ वर्ष पुगिसकेका रोनाल्डोलाई भित्र्याउन युभेन्ट्सले १ सय मिलियन पाउण्ड खर्चेको थियो ।

रियल म्याड्रिडमा ९ वर्ष बिताएका उनले लगातार उपाधि र व्यक्तिगत सफलता हासिल गरेका थिए । उनले थुप्रै व्यक्तिगत तथा टोलीका लागि कीर्तिमान समेत बनाए । उनले गत सिजन रियललाई लगातार तेस्रो च्याम्पियन्स लिग उपाधि दिलाउने क्रममा १५ गोल गर्दै सर्वाधिक गोलकर्ता पनि बने । रियालमा सम्भव भएका सबै उपाधि र व्यक्तिगत कीर्तिमान तोडेपछि क्लब छाड्ने निर्णय लिएका रोनाल्डोलाई लिन क्लबहरुको पंक्ति लामो थियो ।

रोनाल्डोले आफ्नो अर्को गन्तव्य कुनै नयाँ लिगमा रहने बताउँदै आएका थिए । त्यसैअनुसार उनले युभेन्ट्सलाई आफ्नो नयाँ क्लबको रुपमा रोजे । तर युभे रोज्नुअघि उनलाई युरोपका अन्य ठूला क्लबले पनि टोलीमा समेट्ने प्रस्ताव राखेका थिए । रियल म्याड्रिड छाड्नुअघि रोनाल्डोले खेलेकै क्लब म्यानचेस्टर युनाइटेड, फ्रान्सेली च्याम्पियन पेरिस सेन्ट जर्मेन र इटालीयन क्लब एसी मिलानले उनलाई टोलीमा समेट्ने प्रयास गरेका थिए । युनाइटेडसँग उनले एक चरण वार्ता गरेको पनि बुझिएको छ ।

रोनाल्डोले १० जुलाईमा युभेन्ट्स जाने निर्णय गरे । इंग्ल्यान्डमा म्यानचेस्टर युनाइटेडसँग रहेर ६ वर्षमा ९ उपाधि जितेका उनले रियालमा ९ वर्ष बिताउँदा १५ उपाधिमा कब्जा गर्न मदत गरे । रोनाल्डोले युनाइटेड छाडेजस्तै रियल छाड्दा पनि नयाँ चुनौतीको सामना गर्न क्लब छाडेका बताए । उनले ७ पटकको इटालियन च्याम्पियन रोजेर आफ्नो करियरको नयाँ बाटो बुने । उनले विश्वकपमा खराब प्रदर्शन गरेपछि नयाँ क्लबमा आफूलाई उचित स्थानमा राख्न चाडैं निर्णय लिएका थिए ।

रोनाल्डोलाई रियलको बोर्डले क्लबमा अझै रहन नयाँ सम्झौता पनि दिएको थियो । तर रोनाल्डो आफ्नो निर्णयमा अडिग रहे । उनलाई रियलले विश्व कीर्तिमानी २७ मिलियन पाउण्ड प्रतिवर्षको सम्झौताको प्रस्ताव गरेपनि उनले सो प्रस्ताव नकारेका हुन् । रोनाल्डोले युभेन्ट्ससँग गरेको पहिलो वार्तामा नै क्लबमा जाने निर्णय गरेका थिए । युभेका अध्यक्ष आग्नेलीले उनलाई टोलीमा समेट्न गरेको प्रस्ताव रोनाल्डोले एक पटकमै स्वीकारेका थिए ।

एसी मिलानमा रहेका धनि चिनियाँ व्यापारी लि योङहोङ मालिकको ठूलो प्रस्ताव पनि उनले अस्विकार गरेका थिए । मिलानले १ सय ३३ मिलियन पाउण्डको प्रस्ताव गरेपनि रोनाल्डोले भने पछिल्लो समय मिलान कमजोर रहेका कारण उनले त्यहाँ जान आनाकानी गरेका थिए । मिलानले पछिल्लो समय मोटो रकम खर्चेपनि लिगमा भने अपेक्षित प्रदर्शन गर्न सकेको छैन ।

म्यानचेस्टर युनाइटेडले रोनाल्डोले फेरी ओल्ड ट्राफर्डमा ल्याउने इच्छा जाहेर गरेको थियो ।