बार्सिलोना (एजेन्सी)– बार्सिलोनाका सुपरस्टार एवंम् कप्तान लियोनल मेस्सीले आफ्नो टोलीले रक्षपक्तिमा व्यापक सुधार गर्नुपर्ने औल्याएका छन् ।

यदि त्यस्तो गर्न नसकिएको खण्डमा घरेलु वा युरोपियन उपाधि जित्नमा कठिनाई हुने उनको बझाई छ । मेस्सीको कप्तानमा बार्सिलोनाले सिजनको सुरुवात दमदार ढंगले गरेपनि त्यसलाई निरन्तरता भने दिन सकेन ।

ला लिगाका ७ खेलको समाप्तीमा टोलीले ४ खेलमा जित, २ खेलमा बराबरी र १ खेलमा हार बेहोरिसकेको छ । चिर प्रतिद्वन्द्वि रियल म्याड्रिडसँग समान १४ अंक जोडेको बार्सिलोना शीर्षस्थानमा छ ।

पछिल्ला खेलमा भइरहेको कमजोरीका विषयमा बोल्दै च्याम्पियन्स लिगमा टोटेनह्यामसँग हुने खेलमा रक्षापक्तिमा गल्ति गर्न नहुनेमा जोड दिएका छन् ।

‘लगातार रक्षापक्तिको कमजोर प्रदर्शनले निराशा बनाएको छ । हरेक खेलमा गोल खानु राम्रो होइन हामीले त्यसमा सचेत हुनैपर्दछ,’ मेस्सीले भने,‘ गत सिजन हामीविरुद्ध गोल गर्न कठिन हुन्थ्यो । तर अहिले त्यस्तो हुन सकेको छैन ।’

उनले टोटेनह्यामलाई बलियो टोलीका रुपमा उल्लेख गर्दै भने,‘ हामीले बुधबारको खेलका बारेमा सोच्नुपर्दछ । किनकी हामी निकै प्रतिस्पर्धात्मक टोलीविरुद्ध खेल्दैछौं । हामीले धेरै सुधार गर्न पर्नेछ भन्ने थाहा छ ।

टोलीको प्रदर्शनमा उचारचढाव रहेपनि मेस्सीको व्यक्तिगत प्रदर्शन भने स्तरीय रहँदै आएको छ । सिजनमा खेलेका ९ खेलमा उनले ८ गोल गरिसकेका छन् ।