म्याड्रिड (एजेन्सी) – स्पेनिस ला लिगा अन्तर्गत शनिबार रियल म्याड्रिड र एटलेटिको म्याड्रिडबिचको खेल गोलरहित बराबरीमा टुंगिएको छ । यस बराबरीसँगै रियलले शीर्ष स्थानमा बार्सिलोनालाई उछिन्ने मौका पनि गुमायो ।

अघिल्लो साता सेभिल्ल्लासँग ३-० ले पराजित म्याड्रिडले यस खेलमा जित दर्ता गरेको अवस्थामा लिग तालिकामा २ गोलको अग्रता बनाउने अवसर थियो । शनिबारै भएको खेलमा बार्सिलोना र एथलेटिक बिल्बाओले १-१ को बराबरी खेलेका थिए । निकै प्रतिस्पर्धात्मक खेलको पहलो हाफमा ग्यारेथ बेल चोट लाग्दै मैदान बाहिरिएका थिए । उनले त्यसअघि गरेको एक भली प्रहार पोस्टभन्दा थोरै बाहिर गएको थियो ।

एटलेटिको म्याड्रिडले पनि अग्रता लिने अवसरको उचित सदुपयोग गर्न सकेन । एन्टोइन ग्रिज्मनको प्रहार रियलका गोलरक्षक थिबाउट कोर्टुवाले बचाएका थिए । अर्का फरवार्ड डिएगो कोस्टाको कठिन समय शनिबार पनि जारी रहयो । कोस्टाले पछिल्लो १६ खेलमा गोल गर्न सकेका छैनन् । शनिबार पनि उनले चेल्सीका पूर्व सहकर्मी कोर्टुवाविरुद्ध कुनै अवसरको उपयोग गरेनन् । उनले पछिल्लो सिजन पनि सिजनको अन्त्यमा खराब प्रदर्शन गरेपछि केहि समय बेन्चमा बसेका थिए ।

बेलको प्रस्थानपछि पनि रियलले नै दोस्रो हाफमा दबाब राखेको थियो । मारको एसेन्सियोको प्रहार एटलेटिकोका गोलरक्षक जान ओब्लाकले विफल तुल्याएका थिए भने ड्यानी कर्भाजाल पनि उनलाई बिट गर्न असफल रहे । रियलले बलमा धेरै पकड बनाउँदै पोस्ट आक्रमण निरन्तर गरेपनि अन्तिम समयसम्म पनि गोल गर्न सकेन ।

रियलले अब च्याम्पियन्स लिग अन्तर्गत मंगलबार सीएसकेए मस्कोको सामना गर्नेछ । एटलेटिकोले भने बुधबार सोहि प्रतियोगितामा क्लब ब्रुजासँग प्रतिस्पर्धा गर्नेछ ।