लन्डन (एजेन्सी)– लन्डन क्लब चेल्सीले आज राति मर्सिसाइड क्लब लिभरपुललाई घरेलु मैदानमा निम्त्याउदैछ । चेल्सी र लिभरपुलबीचको खेल आज राति १०ः१५ बजे शुरु हुनेछ । यी दुई टोली पछिल्लो एक हप्तामा दुई पटक भिड्न लागेका हुन् ।

कारबाओ कपमा यि दुई टोलीले प्रतिस्पर्धा गरेका थिए । एनफिल्डमा भएको खेलमा चेल्सीले घरेलु टोली लिभरपुललाई २–१ ले निराश पारेका थिए । लिभरपुललाई निराश पर्ने क्रममा हजार्डले उच्च प्रदर्शनसहित निर्णायक गोल गरेका थिए ।

प्रिमियर लिगको खेल भने चेल्सीको घरेलु मैदान स्टामफोर्ड ब्रिजमा हुदैछ । घरेलु टोली चेल्सी लिभरपुललाई फेरि एकपटक निराश पार्दै अघि बढ्ने योजनामा मैदान उत्रनेछ । चेल्सीका लागि इडेन हजार्ड, एङ्गोलो कान्टे, विलियन र जर्गिन्हो मुख्य हतियार हुनेछ । चेल्सीले पछिल्लो चार भेटमा लिभरपुलसँग पराजित हुनुपरेको छैन । पछिल्लो चार भेटमा चेल्सीले दुई जित र दुई बराबरीको नतिजा निकालेको छ ।

यता, लिभरपुल चेल्सीलाई घरेलु मैदानमा पराजित गर्दै कारबाओ कपमा भोगेको हारको बदला लिने योजनामा हुनेछ । र प्रिमियर लिगमा आफ्नो अपराजित यात्रालाई निरन्तरता दिने योजनामा हुने छ । लिभरपुलका लागि रोबर्टो फिर्मिनो, साडियो माने, मोहम्मद सलाह र गोलरक्षक एलिसन बेकर मुख्य हतियार हुनेछ । पछिल्लो चार भेटमा निकाल्न नसकेको जिन्क तोड्ने लिभरपुलको योजना हुनेछ ।

प्रिमियर लिगमा अपराजित रहेको लिभरपुल शतप्रतिशत जितसहित १८ अंक जोडेर लिगको शीर्ष स्थानमा रहेको छ । अपराजित नै रहेको चेल्सी समान ६ खेलबाट १६ अंक जोडेर लिगको तेस्रो स्थानमा रहेको छ । १६ अंक नै रहेको साविकको विजेता म्यानचेस्टर सिटी गोल अन्तरमा चेल्सीभन्दा अघि छ ।

प्रिमियर लिगका अन्य खेलहरु
वेस्टह्याम युनाइटेड विरुद्ध म्यानचेस्टर युनाइटेड (साँझ ५ः१५ बजे)
आर्सनल विरुद्ध वाट्फोर्ड (साँझ ७ः४५ बजे)
एभर्टन विरुद्ध फुलहम (साँझ ७ः४५ बजे)
हडर्सफिल्ड टाउन विरुद्ध टोटनहम हस्टपर (साँझ ७ः४५ बजे)
म्यानचेस्टर सिटी विरुद्ध ब्राइटन एन्ड लहोभ अल्वियोन (साँझ ७ः४५ बजे)
न्यु क्यास्टल युनाइटेड विरुद्ध लेस्टर सिटी (साँझ ७ः४५ बजे)
वल्भरह्याम्पटन विरुद्ध साउथह्याम्पटन (साँझ ७ः४५ बजे)