एजेन्सी – क्याटलान क्लब बार्सिलोनाले यसै सिजनको अन्त्यमा क्लबको लोगो परिवर्तन गर्ने तयारी गरेको छ । क्लबले हाल प्रयोगमा आएको लोगोमा थोरै परिवर्तन गर्दै नयाँ लोगो तयार पारिसकेको छ ।

लोगोको इतिहास

सन् १९१० को दशक देखि क्लबको लोगोमा रहँदै आएको एफसी बार्सिलोनाको छोटो लेखनलाई हटाउने तयारी क्लबले गरेको छ । यसबाहेक लोगोको भित्रि भागमा रहेको कालो धर्सा पनि हटाउने भएको छ । यसअघि लोगोमा ७ स्ट्राइप रहेकोमा त्यसलाई पनि घटाएर ५ स्ट्राइप कायम गरिएको छ । यसअघि पनि बार्सिलोनाले पटक पटक लोगो परिवर्तन गर्दै आएको थियो ।

हाल प्रयोग भइरहेको लोगो सन् २००२ मा स्थापित गरिएको थियो । यसपटक मुख्य आकर्षणको रुपमा अक्षर हटाउने प्रयास गरिएको छ । क्लबको बजारीकरण गर्न यसले सहज हुने जानकारहरुको बुझाई छ । क्लबको बोर्ड निर्देशकहरुले लोगो परिवर्तनका लागि हरियो झन्डा देखाइसकेका छन् भने अब क्लबका सदस्यहरुले अक्टोबर २० मा यसको निर्णय लिनेछन् ।

नयाँ लोगो (दायाँ)

‘क्लबको ब्राण्ड स्थापित गर्न थुप्रै कदम अगाडी चालिएका छन् । त्यसमध्ये लोगो नयाँ बनाउने पनि एउटा कार्यक्रम हो । नयाँ लोगोले क्लबको पहिचान अझै गाढा रुपमा प्रस्तुत गर्न सकिने विश्वास लिएका छौं,’ क्लबले जारी गरेको विज्ञप्तिमा उल्लेख छ । सदस्यहरुबाट पनि प्रस्ताव पारित भएको खण्डमा लोगो अर्को सिजन नै प्रयोगमा आउनेछ ।