टुरीन (एजेन्सी) – इटालियन सिरी ए अन्तर्गत बुधबार साविक विजेता युभेन्ट्सले बोलोग्नालाई पराजित गरेको छ । लिगमा लगातार छैटौं जित दर्ता गर्ने क्रममा युभेन्ट्सले २-० को सहज जित दर्ता गर्यो ।

खेलको ११ औं मिनेटमा पाउलो डिबालाले गोल गर्दै युभेलाई अग्रता दिलाएका थिए । उनले गोलरक्षकले बचाउ गरेको बल रिबाउन्डमा आएपछि गोल गर्दै अग्रता दिलाएका थिए । त्यसको पाँच मिनेटपछि नै युभेन्ट्सले अग्रता दोब्बर पार्यो । क्रिस्टियानो रोनाल्डोको पासमा ब्लेस माटुइडीले गोल गर्दै युभेलाई २-० ले अगाडी पुर्याए । युभेले थप अवसर सिर्जना गरेपनि गोल थप्न भने सकेन ।

इटालियन लिगमा लगातार तेस्रो सिजन युभेले सुरुआती ६ खेल जितेको छ । पछिल्ला सात सिजन लिग उपाधिमा कब्जा जमाएको टुरीन टोलीले यसपटक पनि सोहि लयलाई कायम राख्ने संकेत दिएको छ । खेलभर दबाब बनाएको युभे कुनै समय पनि दबाबमा रहेन । ७७ प्रतिशत बल पोसेसन राखेको टोलीले प्रहार गरेको १५ सटमध्ये ८ प्रहार गोलतर्फ लागेका थिए ।

लिगको अन्य खेलमा नेपोलीले पार्मालाई ३-० ले पराजित गर्दै युभेलाई पछ्याउने क्रम जारी राख्यो । नेपालीको ६ खेलमा १५ अंक रहेको छ । लाजियोले उडीनेजेलाई २-१ ले हराउँदै १२ अंकसहित तेस्रो स्थानमा स्थान बनायो । एएस रोमाले फ्रोसीनोनेलाई ४-० ले पराजित गर्दै लिगको दोस्रो जित दर्ता गर्न सफल रहयो । काग्लीयारी र साम्पडोरीयाको खेल गोलरहित बराबरीमा टुंगियो । जेनोआले किएभोलाई २-० ले हरायो ।