लन्डन (एजेन्सी) – प्रिमियर लिग प्रतिद्धन्द्धी वाटफोर्डलाई पराजित गर्दै टोटनहम कारबाओ कपको चौथो चरणमा प्रवेश गर्न सफल भएको छ । टोटनहमले वाटफोर्डलाई पेनाल्टी सुटआउटमा ४–२ ले पराजित गर्दै कारबाओ कपको प्रि–क्वाटरफाइनलमा पुग्न सफल भएको हो ।

प्रतिस्पर्धात्मक बनेको खेल निर्धारित समयमा २–२ गोलको बराबरीमा सकिएपछि खेलको निर्णय पेनाल्टी सुटआउटबाट लिइएको हो । जसमा टोटनहमले ४–२ ले बाजी मारेको हो । प्रतिस्पर्धात्मक बनेको खेलको पहिलो हाफ गोलरहित बराबरीमा सकिएको थियो ।

दोस्रो हाफको सुरुमै टोटनहम पछि परेको थियो । ४६औं मिनेटमा इसाक सक्सेसले गोल गर्दै वाटफोर्डलाई अग्रता दिलाएका थिए । ८१औं मिनेटमा वाट्फोर्ड १० खेलाडीमा समेटियो । इरिक लमेलालाई डि–बक्समा लडाएपछि क्रिस्यिन कावासेलीले रातो कार्ड खादै मैदान बाहिरिए । त्यसमै प्राप्त पेनाल्टीमा डेले अलीले गोल गरेपछि खेल १–१ गोलको बराबरीमा पुगेको थियो ।

८६औं मिनेटमा इरिक लमेलाले गोल गरेपछि टोटनहम खेलमा २–१ ले अघि बढेको थियो । तर, ८९औं मिनेटमा इटिनेले गोल गरेपछि खेल २–२ गोलको बराबरीमा सकिएको थियो । पेनाल्टी सुटआउटमा टोटनहमका ह्युङ मिन सन, इरिक लमेला, मार्काे लोरेन्ट र अलीले गोल गरे । वाटफोर्डका सक्सेस र इटिनेले गोल गर्न सफल भए ।

कारबाओ कपका अन्य खेलका नतिजा

नथिङघम फरेस्ट विरुद्ध स्टोक सिटी (३–२)

वेस्टह्याम युनाइटेड विरुद्ध म्याकल्सफिल्ड टाउन (८–०)