काठमाडौं (हाम्रो खेलकुद)– अर्को साता बंगलादेशमा सुरु हुने बंगबन्धु गोल्ड कपमा अघिल्लो संस्करणमा भन्दा यसपटक चुनौति कठिन रहेको नेपाली राष्ट्रिय फुटबल टोलीका कार्यवहाक प्रशिक्षक बालगोपाल महर्जनले बताएका छन् ।

‘अघिल्लो संस्करणमा भन्दा यसपटक स्तरीय टोली छन् । त्यसले पनि चुनौति त छ । फिफा वरियतामा पनि माथि भएका टोली छन्,’ बंगबन्धुका लागि प्रशिक्षण सुरु भएको पहिलो दिन मंगलबार प्रशिक्षक महर्जनले भने,‘ तर, विपक्षीमा जुन टोली भएपनि हामीले आफ्नो ठाँउबाट सक्दो प्रयास गर्ने हो । एक एक कदम चाल्दै अघि बढ्ने हो ।’

साविक विजेताका हैसियामा बंगलादेश पुग्दा राम्रो नतिजाका लागि टोलीमाथि दबाब पर्नु स्वभाविक भएको उल्लेख गर्दै महर्जनले भने,‘ यसअघिको विजेता भएपछि स्वभाविक रुपमा अपेक्षा पनि त्यहि अनुसार हुन्छ नै । सजिलो पक्कै छैन । हाम्रो लक्ष्य समूह चरणका दुई खेलमा अंक नगुमाई अघि बढ्ने हुनेछ ।’

समूह एमा रहेको नेपालले प्यालेस्टानइन र ताजकिस्तानसँग प्रतिस्पर्धा गर्नुपर्नेछ । अर्को समूहमा फिलिपिन्स, आयोजक बंगलादेश र लाओस छन् । बंगबन्धुमा भाग लिने निर्णय ढिला भएकाले तयारी छोटो हुने भएपनि त्यसले खासै असर नगर्ने महर्जनको भनाई थियो ।

‘साफ च्याम्पियनसिपबाट फर्केपछि सबैले आ आफ्नो क्लबमा अभ्यास गरेका छन्,’ उनले भने,‘ आजबाट बल्ल प्रशिक्षण सुरु गरेका छौं । हेर्दा छोटो सयम लाग्छ । तर हामीले एसियाली खेलकुद र साफ च्याम्पियनसिपका लागि लामो समयदेखि तयारी गरिरहेका छौं ।’ बंगबन्धु गोल्ड कप असोज १५ गतेबाट सुरु हुनेछ ।

सोमबार २० सदस्यीय टोली घोषणा गर्दा अनुभवी दुई खेलाडी गोलकिपर किरण चेम्जोङ र मिडफिल्डर रोहित चन्दलाई भने समावेश गरिएको छैन । व्यावसायिक खेलका लागि किरण माल्दिभ्स र रोहित इन्डोनेसिया गएपछि उनीको ठाँउमा महर्जनले गोलकिपर विशाल श्रेष्ठ र रक्षक तेज तामाङलाई समावेश गरेका छन् ।

किरण र रोहित टोलीका महत्वपूर्ण सदस्य भएको उल्लेख गर्दै महर्जनले भेन,‘ उनीहरु टोलीका लागि आवश्यक खेलाडी हुन् । तर, अहिले समेटिएका खेलाडी पनि प्रतिभावान हुन् । त्यसले खासै फरक पर्दैन । ’