काठमाडौं (हाम्रो खेलकुद)– अर्को साता बंगलादेशमा सुरु हुने बंगबन्धु गोल्डकपका लागि नेपाली फुटबल टोलीले मंगलबारबाट अभ्यास सुरु गरको छ । शसस्त्र प्रहरी बलको हलचोकस्थित मैदानमा भएको प्रशिक्षणमा पहिलो दिन ९ खेलाडीमात्र उपस्थित भएका थिए ।

तस्बिरहरु : विवेक सुवेदी/हाम्रो खेलकुद

उनीहरुलाई राष्ट्रिय टोलीका कार्यवहाक मुख्य प्रशिक्षक बालगोपाल महर्जन,प्रशिक्षक किरण श्रेष्ठ र गोलकिपर प्रशिक्षक नवीन महर्जनले प्रशिक्षण दिएका थिए । ९ खेलाडीले झन्डै २ घन्टा अभ्यासमा पसिना बगाएका थिए । अखिल नेपाल फुटबल संघ (एन्फा) ले सोमबार मात्रै बंगबन्धु गोल्डका लागि २० सदस्यीय टोलीको घोषणा गरेको थियो ।

गत महिना बंगलादेशमै भएको साफ च्याम्पियनसिपको सेमिफाइनलमा पुगेको नेपाली टोलीमा यसपटक २ खेलाडी मात्र परिवर्तन भएका छन् । व्यवसायिक फुटबलका लागि नेपाली टोलीका पहिलो रोजाईका गोलकिपर माल्दिभ्स र मिडफिल्डर रोहित चन्द इन्डोनेसिया रहेका कारण उनीहरुको ठाँउमा गोलकिपर विशाल श्रेष्ठ र रक्षक तेज तामाङलाई टोलीमा समेटिएको ।

शिक्षणमा थ्री स्टारका निराजन खड्का, एलन न्यौपाने, सुनिल बल र अनन्त तामाङ, पुलिसका तेज तामाङ र दिनेश राजवंशी, एपीएफका आदित्य चौधरी, आर्मीका नवयुग श्रेष्ठ र विमल घर्तीमगर सामेल थिए । नेपाल बंगबन्धुको साविक विजेता हो । तर, यसपटक ढिला गरि मात्रै नेपालको सहभागिता निश्चित भएको थियो । अघिल्लो पटक च्याम्पियन बन्दा ५० हजार अमेरिकी डलर पुरस्कार रकममध्ये २५ हजार डलर मात्रै पाएपछि नेपालले पुरा रकम नआउँदा सम्म भाग नलिने अडान लिएको थियो ।

दुई दिन अघि बाँकी रकम उपलब्ध भएपछि एन्फाले बंगबन्धुमा माग लिने निश्चित गरको थियो । असोज १५ देखि २६ गतेसम्म हुने बंगबन्धु गोल्डकपमा नेपाल समूह ‘ए’ मा प्यालेस्टाइन र ताजिकिस्तानसँग रहेको छ । अर्को समूहमा आयोजक बंगलादेश, लावस र फिलिपिन्स छन् । समूहको शीर्ष दुई टोलीले सेमिफाइनलमा स्थान बनाउनेछन् ।