एकै सातामा चेल्सी-लिभरपुल दुई पटक भिड्ने

लण्डन (एजेन्सी) – यसै साता प्रिमियर लिगका दुई ठूला टोली चेल्सी र लिभरपुल दुई भिन्नै खेलमा भिड्दै छन्। काराबाओ कप र इंगलिस प्रिमियर लिगमा एकै साता दुई पटक आमने सामने हुँदैछन्।

काराबाओ कप अन्तर्गत तेस्रो चरणमा लिभरपुलको घरेलु मैदान एनफिल्डमा यहि बुधवार पहिलो खेल हुनेछ भने इंगलिस प्रिमियर लिग अन्तर्गत शनिबार चेल्सीको घरेलु मैदानमा लिभरपुलले निम्तो पाउनेछ । प्रिमियर लिग अन्तर्गत सुरुआती ६ खेलमा दुवै टोली अपराजित छ । शिर्षस्थानमा लिभरपुलको सबै ६ खेलमा जित छ भने ५ जित र १ बराबरीसंगै चेल्सी तेस्रो स्थानमा छ ।

खेलअघि चेल्सीका नवनियुक्त प्रशिक्षक मौरिजो सारीले लिभरपुल चेल्सी भन्दा एक कदम अगाडी रहेको बताए । ‘लिभरपुल ४ वर्ष यता एकै प्रशिक्षकको निरीक्षणमा रहेको छ। हामी भने नँया पद्दतीलाई अंगाल्दै छौं । त्यसैले लिभरपुल भन्दा हामी एक कदम पछाडी छौं ‘, उनले भने ।

लिभरपुलले यसअघिको ३ खेलमा चेल्सीलाई पराजित गरेको छैन । पछिल्लो भेटमा प्रिमियर लिग अन्तर्गत मे २०१८मा भएको खेलमा चेल्सीले घरेलु मैदानमा लिभरपुललाई १-० ले पराजित गरेको थियो। ओलिभर जिरुडको पहिलो हाफको गोल निर्णायक रहेको थियो ।