बार्सिलोना (एजेन्सी) – स्पेनिस ला लिगा अन्तर्गत आइतबार १० खेलाडीमा सिमित क्याटलान क्लब बार्सिलोनाले जिरोनासँग २–२ बराबरी खेल्दै अंक बाँडन बाध्य भएको छ ।

एक समय खेलमा अग्रता लिएको बार्सिलोना पछि परेको अवस्था उल्ट्याएर बराबरी खेल्दै अंक खोस्न सफल भएका हो । बार्सिलोनालाई हारबाट जोगाउन डिफेन्डर जेरार्ड पिकेले गोल गरेका थिए जोगाए । घरेलु मैदान नोउ क्याम्पमा आइतबार राती बार्सिलोनाले १९औं मिनेटमा कप्तान लियोनेल मेस्सीको गोलबाट खेलमा अग्रता बनाएको थियो । तर, ३५औं मिनेटमा बार्सिलोनाले नराम्रो झट्का बेहोर्यो ।

यसै सिजन क्लब भित्रिएका डिफेन्डर क्लेमेन्ट लेङलेटले जिरोनाका खेलाडीलाई अनावश्यक फल गरेपछि रेफ्री जेसस गिलले सिधै रातो कार्ड देखाउदै मैदान बाहिर पठाएपछि बार्सिलोना १० खेलाडीमा समेटिएको थियो । त्यसपछि बार्सिलोना केही दवावमा आएको थियो । फलस्वरुप जिरोनाले पहिलो हाफमै बराबरी गोल गर्न सफल भएको थियो । ४५औं मिनेटमा जिरोनाका क्रिस्टियन स्टुआनीले सुन्दर गोल गर्दै खेललाई बराबरीमा ल्याएका थिए ।

दोस्रो हाफको सुरुआतमै बार्सिलोना खेलमा पछाडी पर्यो । स्टुआनीले ५१औं मिनेटमा गोल गरेपछि बार्सिलोना खेलमा २–१ ले पछि परेको थियो । डिफेन्डर जेरार्ड पिकेले ६३औं मिनेटमा  गोल गर्दै खेललाई २–२ गोलको बराबरीमा ल्याएका थिए । त्यसपछि थप गोल निस्कन निस्कन नसक्दा खेल बराबरीमा सकियो ।

बराबरीपछि बार्सिलोनाले दोस्रो स्थानमा रहेको रियाल म्याड्रिडसँगको अंक दुरी बढाउने मौका गुमायो । दुवै टोलीको समान १३ अंक रहेपनि बार्सिलोना गोलअन्तरको आधारमा ला लिगाको शीर्ष स्थानमा छ । बार्सिलोनाले १६ गोल गर्दै ५ गोल खाएको छ भने रियलले १२ गोल गर्दै ३ गोल मात्र खाएको छ । बार्सिलोनालाई बराबरीमा रोकेको जिरोना ८ अंकसहित छैटौ स्थानमा छ । तेस्रो स्थानमा रहेको डेपोर्टिभो अलाभेसको ५ खेलमा १० अंक रहेको छ ।