रोम (एजेन्सी) – युभेन्टसले् इटालियन सिरी ‘ए’ फुटबलमा अपराजित यात्रालाई कायमै राखेका छ । सिरी ‘ए’ अन्तर्गत आइतबार राति भएको खेलमा फ्रोसिनोनेलाई २–० ले पराजित गर्दैै युभेले आफ्नो अपराजित यात्रालाई निरन्तरता दिएको हो ।

युभेन्टसको जितमा सुपरस्टार क्रिस्टियानो रोनाल्डो र फेडरिको बर्नार्डेस्कीले गोल गरे । फ्रोसिनोनेको घरेलु मैदानमा भएको प्रतिस्पर्धात्मक खेलमा दुवै गोल खेलको अन्तिम समयतिर सम्भव भएको थियो । युभेन्टसले गोलको लागि पटकपटक प्रयास गरेपनि अग्रता लिन ८१ औं मिनेट कुर्नुपरेको थियो ।

बराबरीतर्फ धकेलिएको खेलमा रोनाल्डाले ८१औं मिनेटमा गोल गर्दै युभेन्टसलाई १–० को अग्रता दिलाएका थिए । ,मिरालेम प्यानिचको प्रहारलाई गोलरक्षकले बचाएपनि रिबाउन्डमा आएको बललाई पोर्चुगलका कप्तान रोनाल्डोले गोल गर्न सफल भएका थिए । सिरी ‘ए’ मा रोनाल्डोको यो तेस्रो गोल हो । रोनाल्डोले यसअघि सासुओलोविरुद्धको खेलमा २ गोल गरेका थिए ।

यद्यपी गोल भने विवादको घेरामा नै रहयो । टेलिभिजन रिप्लेमा हेर्दा रोनाल्डो अफसाइड पोजिसनमा रहेको देखिएपनि लाइन्सम्यानले झन्डा उठाएनन् । इटालियन लिगमा भीएआर प्रयोग गर्ने सुविधा भएपनि रेफ्रीले त्यसको प्रयोग गरेनन् । खेलमा गोल गरेसँगै उच्च मनोवलमा रहेको युभेन्टसका लागि फेडरिकोले इन्जुरी समयको थप गरिएको समयमा अर्काे गोल थप्दै २–० को जित दिलाए ।

जितसँगै युभेन्टसले ५ खेलबाट १५ अंक जोड्दै लिगको शीर्ष स्थानमा रहेको छ । फ्रोसनोनेले भने १ अंकसहति १९औं स्थानमा रहेको छ । पछिल्ला ७ सिजन लिग उपाधि जितेको युभेन्ट्स यस सिजन पनि सुरुआती खेलबाट नै लिगमा अग्रतामा छ ।