आर्सनलद्धारा एभर्टन पराजित

इमिरेट्स (एजेन्सी) – इंग्लिस प्रिमियर लिग फुटबलमा आर्सनल विजयी भएको छ । आर्सनलले घरेलु मैदानमा एभर्टनलाई २–० ले पराजित गरेको हो ।

घरेलु मैदान इमिरेट्स स्टेडियममा आइतबार राति भएको खेलमा आर्सनललाई जिताउन एलेक्सान्ड्रे लाकाजेट्टी र पिएरे इमरिक आवुमियाङले गोल गरे । प्रतिस्पर्धात्मक बनेको खेलको पहिलो हाफ गोलरहित बराबरीमा सकिएपनि आर्सनलले दोस्रो हाफमा तीन मिनेटको अन्तरमा दुई गोल गर्दै खेललाई आफ्नो नियन्त्रणमा राख्न सफल भएको थियो ।

५६औं मिनेटमा आरोन राम्सीको पासमा लाकाजेट्टीले गोल गरेपछि आर्सनलले खेलमा १–० को अग्रता लिन सफल भएको थियो । त्यसको तीन मिनेट पछि नै राम्सीकै पासमा आवुमियाङले गोल गरेपछि आर्सनल खेलमा २–० ले अघि बढेको थियो । त्यसपछि दुवै टोलीले गोल गर्न नसक्दा खेल २–० ले आर्सनलले आफ्नो पक्षमा पार्न सफल भयो ।
जितपछि आर्सनल ६ खेलबाट १२ अंक जोडेर लिगको छैटौ स्थानमा उक्लिएको छ । आर्सनलसँग पराजित एभर्टन ६ अंकसहित १२औं स्थानमा छ । १८ अंक जोडेको लिभरपुल लिगको शीर्ष स्थानमा छ ।