काठमाडौं (हाम्रो खेलकुद) – नेपाली राष्ट्रिय टोलीका सदस्यद्वय रन्जन विष्ट र अन्जन विष्ट नाताले सहोदर दाजुभाइ हुन् । दुवै खेलाडी नेपालले सन् २०१६ मा बंगबन्धु गोल्डकप, दक्षिण एसियाली खेलकुद र एएफसी सोलिडारिटी कप जित्दा राष्ट्रिय टोलीका सदस्य रहेका थिए । क्लब फुटबलमा पनि लामो समय एपीएफमा सँगै खेलेका यी दुई अब बेग्लै क्लबबाट साहिद स्मारक ए डिभिजन लिग खेल्ने भएका छन् ।

एन्फा एकेडेमीबाट बाहिर आएलगत्तै एपीएफमा आबद्ध भएका अन्जनले दाई रन्जनकै कारण फुटबल अँगालेका थिए । अन्जन र रन्जनको जोडी २०७२ सालमा आयोजित राष्ट्रिय लिगदेखि विभिन्न मोफसलका प्रतियोगितामा चलेको थियो । यो जोडीले सातौं राष्ट्रिय खेलकुदमा एपीएफलाई स्वर्ण पदक दिलाउँदा उत्कृष्ट प्रदर्शन गरेका थिए । फाइनलमा उपाधि दावेदार मानिएको आर्मीलाई २-० ले पराजित गर्दा अन्जनले नै दुवै गोल गरेका थिए । रन्जनले दुवै गोलमा महत्त्वपूर्ण भूमिका खेलेका थिए । रन्जन ७ वर्षदेखि एपीएफमा रहँदै आएका थिए ।

यसपटकको लिगमा अन्जनले मनाङ मर्स्याङदि क्लबबाट खेल्दैछन् भने रन्जनले मनाङकै चित परिचित प्रतिद्वन्द्वी थ्री स्टार क्लबको आक्रमण सम्हाल्ने भएका छन् । अन्जनले केहि महिनाअघि देखिनै एपीएफ छाडेर मनाङबाट खेल्दै आएका थिए । उनले केहि प्रतियोगितामा मनाङबाट खेलिसकेका पनि छन् । लिगका लागि भने केहि दिन अघिमात्र उनले सम्झौता गरेका हुन् । यता चोटका कारण राष्ट्रिय टोलीबाट बाहिर रहेका रन्जनले २ महिनाअघि मात्र मैदान फर्केका हुन् । एसियन कप छनोटका लागि राष्ट्रिय टोलीमा प्रशिक्षणका दौरान उनी घाइते भएका थिए ।

रन्जनले एपीएफ छाडेर थ्री स्टारबाट खेल्ने निर्णय लिएपछि विष्ट दाजुभाइ अब नेपालकै सबैभन्दा सफल दुई फुटबल क्लबबीच विपक्षीका रुपमा उत्रने पक्का भएको हो । भाइ अन्जनसँग विछोड हुँदा खेलमा पहिलेझैं सहज नहुने रन्जन बताउँछन् । ‘हामी दुवै एकै टोलीबाट खेल्दा निकै सहज हुन्थ्यो । हामीले एक अर्काको खेल्ने शैली बुझेका छौं । विशेषत: उसले खेल्ने शैली निकै डटेर खेल्ने भएकाले मलाई केहि सहज हुन्थ्यो । उसले मलाई कहाँ र कसरि पास दिनुपर्छ तह हुन्थ्यो र मलाई उसले कस्तो मुभ बनाउँछ भन्ने बुझ्न सहज थियो,’ रन्जनले भने ।

सँगै एकै टोलीबाट खेल्दा पनि कहिलेकाहीं असमझदारी भने हुने गरेको रन्जनले बताए । ‘ खेलमा कहिले काहीं गल्ति हुँदा रिसाउने बानि थियो । म पनि बेलाबेलामा रिसाउँथे होला । तर मैदानभित्र जे हुन्थ्यो त्यो घेराभित्र सिमित हुन्थ्यो । दुवै टोलीको राम्रो नतिजाका लागि खेल्ने भएकाले कहिले त्यो कुरा समस्या भएन । अब उ टोलीमा नहुँदा केहि फरक अनुभव पक्कै हुनेछ,’ रन्जनले बताए ।

रन्जन चोटका कारण लामो समयदेखि राष्ट्रिय टोलीमा छैनन् । उनले अब लिगमा थ्री स्टारबाट खेल्दै राष्ट्रिय टोलीमा पुनरागमन गर्ने सोच बनाएका छन् । ‘ राष्ट्रिय टोलीमा फर्कन निकै मिहिनेत गरेको छु । थ्री स्टारले म माथि गरेको विश्वास मैदानमा राम्रो प्रदर्शन गरेर फिर्ता गर्ने लक्ष्य छ । हामीले लिग उपाधिको लक्ष्य राखेपनि १३ खेलमा प्रत्यक खेलको महत्त्व हुने बुझेका छौं,’ रन्जनले भने ।