म्याड्रिड (एजेन्सी) – स्पेनिस ला लिगा अन्तर्गत शनिबार रियल म्याड्रिडले एस्पान्योलविरुद्ध १-० को कठिन जित हासिल गर्यो । ग्यारेथ बेल, मार्सेलो र टोनी क्रुसलाई विश्राम दिएको उक्त खेलमा रियलले निकै मिहिनेत गर्नुपरेको थियो ।

जितसँगै अंक तालिकाको शीर्ष स्थानमा पुगेको रियलका डिफेन्डर राफेल भारानले रियलले सधैं सहज जित मात्र हासिल गर्छ भन्ने अपेक्षा गर्नु गलत रहेको बताए । ‘ हामी सबै खेल ५-० ले नै जित्छौं भन्ने आशा राख्नु राम्रो होइन । हामी मिहिनेत गर्दै अगाडी बढ्छौं र उपाधिका लागि सुखद नतिजाको प्रयास गर्नेछौं,’ उनले भन, ‘हामी तुलनात्मक रुपमा राम्रो टोली भएपनि बल साथमा हुँदा त्यसको सहि उपयोग गर्ने पर्छ । हामीले एस्पान्योलविरुद्ध पनि अवसर सिर्जना गरेका थियौं, तर अन्य खेलको तुलनामा त्यो फितलो रहयो ।’

रियलको जितमा एसेन्सियोले पहिलो हाफको ४१ औं मिनेटमा गरेको गोल नै निर्णायक सावित भएको थियो । एसेन्सियोले रियलको सिनियर टिममा स्थान बनाउनुअघि एक सिजन एस्पान्योलमा बिताएका थिए । उनले सन् २०१५-१६ मा एस्पान्योलबाट खेल्दै प्रभावशाली प्रदर्शन गरेपछि गतवर्ष रियलका तत्कालिन प्रशिक्षक जिनेदिन जिदानले सिधै सिनियर टोलीमा अवसर दिएका थिए । एसेन्सियोले उक्त अवसरलाई सदुपयोग गर्दै रियालमा आफ्नो बलियो प्रदर्शन गर्दै आएका छन् ।

एस्पान्योलविरुद्धको जित निकै कठिन रहेको एसेन्सियोले पनि स्वीकारे । ‘हामीलाई थाहा थियो कि यो खेल सहज हुने छैन । च्याम्पियन्स लिगमा खेलेर आउने बितिक्कै लिग खेलमा त्यसैअनुसार खेल्न कठिन हुन्छ । दोस्रो हाफमा हामीले खासै राम्रो खेल्न सकेनौं,’ उनले भने । रियलले च्याम्पियन्स लिग अन्तर्गत एएस रोमालाई ३-० ले पराजित गरेको थियो । अब रियलले बुधबार हुने खेलमा सेभिल्लाको सामना गर्नेछ ।