टुरिन (एजेन्सी)–पोर्चुगिज तथा युभेन्ट्सका स्टार खेलाडी क्रिस्टियानो रोनाल्डोले च्याम्पियन्स लिगमा खाएको रेड कार्डलेकुनै असर नपर्ने युभेन्ट्सका प्रशिक्षक मासिमिलियानो अलेग्रिले बताएका छन् ।

प्रशिक्षक एलेग्रीले रोनाल्डोको रेड कार्डपछि आलोचना भएपनि उनले आलोचकलाई सावित गर्न केहि गर्न नपर्ने बताएका हुन् । रोनाल्डोले च्याम्पियनस लिगको आफ्नो पहिलो खेलमा भ्यालेन्सियाविरुद्ध खेल्दा रातो कार्ड खाएका थिए । उनले खेलको ३० मिनेटमा नै रातो कार्ड खादै मैदानबाट बाहिरिएका थिए । ३३ बर्षीय रोनाल्डो मैदान बाहिरिए पनि १० खेलाडीमा समेटिएको युभेन्ट्सले भ्यालेनिसयाविरुद्ध २–० ले जित निकालेको थियो ।

रोनाल्डोले साइतबार राति फ्रोसिनोनसँग खेल्दै आफ्नो निराशालाई मेटाउने प्रयास गर्ने छन् । अलेग्रिले रोनाल्डोले आफ्नो करिअरदौरान विभिन्न घटनालाई बिर्संदै लगातार राम्रो प्रदर्शन गरेका कारण यस विषयले पनि कुनै असर नपारें बताए ।

‘रोनाल्डोले उक्त खेलको ३० मिनेटमा उत्कृष्ट प्रदर्शन गरेका थिए, र आउने खेलमा पनि त्यसै गर्नेछन्, ’ अलेग्रिले भने, ‘रोनाल्डोमाथि सधै धेरै आशा हुन्छ । तर, के तपाईलाई लाग्छ की रोनाल्डोसँग अझै पनि आफुलाई सावित गर्न कुनै ठाउँ बाँकी छ ? मलाई लाग्छ की उनले अब खेल्नु र आनन्द लिन जरुरी छ । सधैझैं गोल गर्दै अगाडी बढ्नुछ । उनी आफ्नो फुटबल करियरमा सबै थोक सावित गरि सकेका छन् ।’

एलेग्रीले थपे, ‘उनी धेरै मिहिनेत गर्ने खेलाडी हुन् । आफूलाई सुधार्न धेरै लागि परेका छन् । त्यसैले मलाई लाग्छ की उनी महान खेलाडी हुन् । बुधबारको खेल अब अतित भइसकेको छ ।’ जुलाईमा रियल मडिडबाट युभेन्ट्स पुगेका रोनाल्डोले यस सिजन पाँच खेल खेल्दै मात्र दुई गोल गरेका छन् ।