लन्डन (एजेन्सी) – इंग्लिस प्रिमियर लिग फुटबलमा टोटनहम विजयी भएको छ । टोटनहमले ब्राइटन एन्ड होभ अल्वियोनलाई २–१ ले पराजित गरेको हो ।

टोटनहमको जितमा ह्यारी केन र इरिक लमेलाले गोल गरे । पराजित टिमका एन्थोनी नकआर्टले सान्त्वना गोल फर्काए । ब्राइटनको घरेलु मैदानमा शनिबार राति भएको प्रतिस्पर्धात्मक खेलमा टोटनहमले ४२औं मिनेटमा पेनाल्टी गोलमार्फत अग्रता लिन सफल भएको थियो ।

४०औं मिनेटमा किरियन ट्रिपरको फ्रिकिक प्रहार ब्राइटनका ग्लेन मुरेले डि–बक्समा ह्यान्ड गर्न पुगेपछि टोटनहमले पेनाल्टीको मौका पाएको थियो । जसमा ह्यारी केन चुकेनन् । पहिलो हाफमा १–० को अग्रता बनाएको टोटनहमले दोस्रो हाफमा थप एक गोल गर्न सफल हुँदा एक गोल खान पुगेको थियो ।

७६औं मिनेटमा ड्यानी रोजको पासमा इरिक लमेलालले गोल गरेपछि टोटनहम २–० ले अघि बढेको थियो । घरेलु टोलीका एन्थोनीले इन्जुरी समयमा गोल गर्दै खेलमा फर्कने संकेत दिएपनि त्यो खेलमा फर्कन निकै ढिला बनेको थियो । त्यसपछि थप गोल ननिस्कदा अन्ततः एन्थोनीको गोल सान्तवना गोल बन्यो ।

जितपछि टोटनहम ६ खेलबाट १२ अंक जोडेर लिगको पाँचौ स्थानमा रहेको छ । पराजित ब्राइटन ५ अंकसहित १३औं स्थानमा छ । शतप्रतिशत जित निकालेको लिभरपुल १८ अंक जोडेृर लिगको शीर्ष स्थानमा रहँदा म्यानचेस्टर सिटी १६ अंकसहित दोस्रो तथा १५ र १३ अंक जोडेर चेल्सी र वाट्फोर्ड क्रमश तेस्रो र चौथो स्थानमा रहेको छ ।