बर्नली (एजेन्सी) – इंग्लिस प्रिमियर लिग फुटबलमा बर्नलीले फराकिलो जित दर्ता गर्दा उपाधिको दावेदार म्यानचेस्टर युनाइटेड बराबरीमा रोकिएको छ । बर्नलीले एएफसी बर्नमाउथमाथि ४–० को फराकिलो जित निकाल्दा म्यानचेस्टर युनाइटेड वल्भरह्याम्पटन वन्डरर्ससँग १–१ गोलको बराबरीमा रोकिएको हो ।

बर्नलीको घरेलु मैदान टर्फ मुरमा शनिबार राति भएको खेलमा घरेलु टोलीलाई जिताउन एस्ले वारनेसले दुई तथा माटिज भ्याड्रा र आरोन लेनननले समान एक गोल गरे । बर्नलीले ३९औं मिनेटमा माटिजको गोलबाट अग्रता बनाएको थियो । त्यसको दुई मिनेटपछि आरोनले गोल गरेपछि बर्नलीले पहिलो हाफमा २-० को अग्रता बनाएको थियो ।

दोस्रो हाफमा दुवै गोल एस्ले वारनेसले गरे । उनले ८३ र ८८औं मिनेटमा गोल गर्दै टिमलाई ४–० को फराकिलो जित दिलाए । जारी सिजनमा बर्नलीको यो पहिलो जित हो । जितसँगै बर्नलीले ६ खेलबाट ४ अंक जोड्दै १६औं स्थानमा उक्लिएको छ । बर्नलीसँग पराजित बर्नमाउथ १० अंकसहति सातौ स्थानमा छ ।

शनिबार राति नै भएको अर्काे खलेमा उपाधिको दावेदार म्यानचेस्टर युनाइटेड घरेलु मैदानमा वल्भरह्याम्पन वन्डरर्ससँग १–१ गोलको बराबरीका रोकिएको छ । युनाइटेडले खेलमा  लिएको अग्रता जोगाउन नसक्दा बराबरीमा रोकिन पुगेको हो ।

युनाइटेडले १८औं मिनेटमा फ्रेडको गालेबाट अग्रता बनाएको थियो । तर, ५३औं मिनेटमा जोओ मौटिन्होले गोल गर्दै खेललाई बराबरीमा ल्याएको थियो । त्यसपछि दुवै टोलीले गोल गर्न नसक्दा खेल बराबरीमा सकियो र दुवै टोलीले अंक बाँडे । बराबरीपछि युनाइटेड १० अंकसहति छैटौ तथा वन्डरर्स ९ अंकसहित १०औं स्थानमा छ ।

प्रिमियर लिगका आजको नतिजाहरु

फुुलहम विरुद्ध वाट्फोर्ड (१–१)

बर्नली विरुद्ध एएफसी बर्नमाउथ (४–०)

कार्डिफ सिटी विरुद्ध म्यानचेस्टर सिटी (०–५)

क्रिस्टल प्यालेस विरुद्ध न्यु क्यास्टल युनाइटेड (०–०)

लेस्टर सिटी विरुद्ध हडर्स फिल्ड टाउन (३–१)

लिभरपुल विरुद्ध साउथह्याम्पटन (३–०)

म्यानचेस्टर युनाइटेड विरुद्ध वल्भरह्याम्पटन वन्डरर्स (१–१)