कार्डिफ (एजेन्सी) – डिफेन्डिङ च्याम्पियन म्यानचेस्टर सिटीले इंग्लिस प्रिमियर लिग फुटबलमा फराकिलो जित निकालेको छ । लिग अन्तर्गत शनिबार राति भएको खेलमा सिटीले कार्डिफ सिटीलाई उसकै मैदानमा ५–० को फराकिलो अन्तरले पराजित गरेको हो ।

कार्डिफमा भएको खेलमा सिटीलाई फराकिलो जित दिलाउन रियाद महारेजले दुई तथा सर्जियो अग्विरो, बर्नार्डाे सिल्भा र इकेए गुन्डोगानले समान एक गोल गरे ।
एकपक्षीय बनेको खेलमा सिटीले पहिलो गोल गर्न भने खेलको ३२औं मिनेट कुर्नुपरेको थियो ।

३२औं मिनेटमा बर्नार्डाे सिल्भाको पासमा अग्विरोले गोल गरेपछि सिटी १–० ले अघि बढेको थियो । त्यसको तीन मिनेटपछि नै सिल्भाले लिरोए सानेको पासमा गोल गर्दै सिटीलाई २–० को अग्रता दिलाए । ४४औं मिनेटमा रहिम स्ट्रलिङको पासमा इकेए गुन्डोगानले गोल गरेपछि सिटीले पहिलो हाफमै ३–० को आरामदायी अग्रता बनाएको थियो ।

दोस्रो हाफमा सिटीको गोल गर्ने क्रम रोकिएन । दोस्रो हाफमा दृश्यमा रियाद महारेज आए । उनले ६७ र ८९औं मिनेटमा गोल गर्दै सिटीलाई ५–० को फराकिलो जित दिलाए । कार्डिफले भने कुनै पनि समय सिटीको पोस्टमा आक्रमण बुन्न नसक्दा घरेलु मैदानमा फराकिलो हार बेहोर्न बाध्य बन्यो ।

जितसँगै सिटी लिगको दोस्रो स्थानमा उक्लन सफल भएको छ । सिटीको ६ खेलबाट १६ अंक पुगेको छ । शीर्ष स्थानमा रहेको लिभरपुलको ६ खेलबाट १८ अंक छ । एक खेल कम खेलेको चेल्सी १५ अंकसहित लिगको तेस्रो स्थानमा छ । सिटीसँग पराजित कार्डिफको २ अंकसहति १९औं स्थानमा छ ।