सलाहको गोल खडेरी अन्त्य

लिभरपुल (एजेन्सी) – करिब १ महिना यता लिभरपुलको लागि गोल गर्ननसकेका मोहमद सलाहले शनिबार प्रिमियर लिगअन्तर्गत साउथह्याम्प्टनविरुद्ध गोल गर्दै गोलको खडेरी अन्त्य गरेका छन्। अघिल्लो सिजन उत्कृष्ट लयमा रहेका इजिप्सियन विंगर सलाहले ४ साता यता गोल गरेका थिएनन् ।

प्रिमियर लिगमा ब्राइटनविरुद्द अघिल्लो पटक गोल गरेका सलाहले साउथह्याम्प्टनविरुद्ध पहिलो हाफको अन्त्यमा गोल गर्दै खडेरी अन्त्य गरे। यो सिजन उनको सातौँ खेलमा तेस्रो गोल हो। पहिलो हाफमा लिभरपुल ३-० को अग्रतामा छ। अघिल्लो सिजनको प्रदर्शनबाट समर्थकमाझ अपेक्षा बढाएका सलाहले पछिल्लो ४ खेलमा गोल गर्ननसक्दा केही दबाब महसुस गरेका थिए।

सलाह फिफाले वर्षेनी प्रदान गर्दै आएको उत्कृष्ट खेलाडी अवार्ड, फिफा द बेस्ट स्वर्दको शीर्ष तीनमा परेका छन् । उनीसँगै युभेन्ट्सका क्रिस्टियानो रोनाल्डो र रियल म्याड्रिडका लुका मोड्रीच अवार्डको दावेदारीमा छन् ।