म्यानचेस्टर (एजेन्सी) – इंग्लिस क्लब म्यानचेस्टर युनाइटेडका पूर्व प्रशिक्षक सर एलेक्स फर्गुसन गत मे महिनामा टाउकोको शल्यक्रिया गरेपछि पहिलो पटक युनाइटेडको घरेलु मैदान ओल्ड ट्राफर्ड फर्केका छन् ।

शनिबार प्रिमियर लिग अन्तर्गत वल्भरह्याम्पटन वान्डरर्सविरुद्धको खेल हेर्न फर्गुसन मैदान पुगेका हुन् । ७६ वर्षीय फर्गुसनलाई विशेष कक्षमा खेल हेर्न जाने क्रममा समर्थकहरुले ताली बजाउँदै स्वागत गरेका थिए । ‘ यो निकै लामो यात्रा रहयो,’ शनिबारको खेल अघि उनले भने, ‘ मेरो स्वास्थ्यमा क्रमिक सुधार आएको छ । चिकित्सकको सल्लाहअनुसार सबै कार्य अगाडी बढेको छ ।’

मैदानमा उपस्थित समर्थकहरुले खेलको २७ औं मिनेटमा फर्गुसनले क्लबमा व्यतित गरेका २७ वर्षको सम्मान गर्दै ताली बजाउँदै विशेष क्षण बनाएका थिए । फर्गुसन ५ मेमा ब्रेन हेमोर्हेज भएपछि शल्यक्रिया गरेर केहि दिन आईसीयूमै रहेका थिए । उनी पछिल्लो पटक २९ अप्रिलमा ओल्ड ट्राफर्ड आएका थिए । त्यसै खेलमा फर्गुसनले आर्सनल प्रशिक्षक आर्सेन वेंगरलाई विशेष सम्मान पनि दिएका थिए ।

फर्गुसनले म्यानचेस्टर युनाइटेडको आधिकारिक टेलिभिजनसँग बोल्दै मैदानमा फर्कन पाउँदा निकै खुसी रहेको बताए । ‘मैदानम फर्कन निकै उत्साहित छु र नर्भस पनि । पछिल्लोपटक आर्सनलसँगको खेल धेरै समय अगाडी थियो । लामो समयपछि मैदान फर्कन पाउँदा अर्कै अनुभूति भइरहेको छ,’ उनले भने, ‘खेल सुरु हुने क्षण केहि भावुक हुन्छु होला । आशा छ नतिजा हाम्रो पक्षमा नै आउनेछ ।’