लन्डन (एजेन्सी)–चेल्सीका फरवार्ड इडेन हाजार्ड बार्सिलोनाका कप्तान तथा अर्जेन्टिनाका स्टार खेलाडी लियोन मेस्सी र युभेन्ट्सका स्टार खेलाडी क्रिस्टियानो रोनाल्डोसँगै समान तहमा रहेको उनका सहकर्मी पेड्रो रोड्रिगेजले बताएका छन् ।

पेड्रोले बार्सिलोनामा रहँदा मेसीसँग रहेर लामो समय खेलेका थिए । मेसीले पछिल्लो दशक कीर्तिमानको क्रमलाई निरन्तरता दिँदा पेड्रोको भूमिका पनि महत्त्वपूर्ण रहेको थियो । पेड्रोले भने, ‘हाजार्ड विश्वका शीर्ष चार खेलाडी मध्ये एक हुन् । जब तपाई लियोनल मेस्सी, क्रिस्टियानो रोनाल्डो, नेयमार र इडेन हाजार्ड देख्नु हुन्छ त उनी विश्वका शीर्ष चार फुटबलर मध्येका एक हुन् ।’

स्पेनिस राष्ट्रिय टोलीका सदस्य रहेका पेड्रोले थपे, ‘बेल्जियम सुपरस्टार खेलाडी हाजार्डसँग भविष्यमा बेलोन डि ओर उपाधि जित्न सक्ने क्षमता छ । यस सिजन उनको लय चेल्सीका लागि एक महान संकेत हो र हाजार्ड हाम्रा लागि एक धेरै महत्वपुर्ण खेलाडी समेत हुन् ।’

इंग्लिस प्रिमियर लिगमा चेल्सीका लागि यस सिजन हाजार्डले पाँच खेलमा पाँच गोल समेत गरिसकेका छन् । उनले यस सिजनको सुरुवाती पाँच खेलमा चेल्सीलाई जिताउन महत्वपुर्ण भुमिका खेलेका छन् । यस सिजनको च्याम्पियन्स लिगमा चेल्सीले सहभागीता जनाएको छैन । चेल्सी खेलाडीले आफ्नो प्रदर्शन यस सिजजन आफ्नो घरेलु प्रतियोगितामा देखाउने छन् । जहाँ उनीहरु घरेलु उपाधिका लागि लड्ने छन् ।