काठमाडौं (हाम्रो खेलकुद)– राष्ट्रिय फुटबल टोलीका पूर्व कप्तान अनिल गुरुङले १३ वर्षपछि रुस्लान थ्री स्टार क्लबमा फर्केका छन् । घरेलु फुटबल अर्को चर्चित क्लब लक्ष्मी हुन्डाई मनाङ मस्र्याङ्दीसँगको लामो यात्रा औपचारिक रुपमा अन्त्य गरेको भोली पल्टै बिहीबार उनी थ्री स्टारमा आबद्ध भएका हुन् ।

‘थ्री स्टार क्लबले जहिले पनि खेलाडीलाई सम्मान गरेको मैलले पाएको छु । त्यसअर्थमा मलाई एकदम खुसी लागेको छ,’ अनिलले भने, ‘हामी दुवै पक्ष एकदमै खुसी भएर यो सम्झौता गरेका हौं । ‘उनको सम्झौता एक वर्षको रहेको छ । यसअघि उनी सन् २००५ मा थ्री स्टार गएका थिए । अर्को ए डिभिजन क्लब ब्रिगेड ब्वाइज क्लबबाट उनी थ्री स्टार गरेको थिए ।

थ्री स्टारबाट उनले प्रेसिडेन्ट्स कप खेलेका थिए । त्यति बेला अनिल थ्री स्टारमा हुँदा मनाङ लिग च्याम्पियन बनेको थियो । त्यति बेला थ्री स्टारमा छोटो समयमा बसेका थ्री स्टार २००६ मा मनाङमा आबद्ध भएका थिए । उनी मनाङमा गएको पहिलो वर्ष भने थ्री स्टार लिग च्याम्पियन बनेको थियो ।

मनाङमा रहँदा उनको खेल जीवनले नयाँ मोड लियो उनी आइलिग टोली सिलोङ लाजोङ पुगेका थिए । ३ वर्ष लाजोङमा बिताएका उनले बेलायती क्लब वोकिङमा ट्रायल पनि दिएका थिए । क्लबले लिएको लिग जित्ने लक्ष्य पुरा गराउन आफ्नो तर्फबाट सक्दो प्रयास गर्ने अनिलले बताए । ‘मैले दुई दिन थ्री स्टारमा प्रशिक्षण गरे । खेलाडीहरु पनि खुसी छन्,’ उनले भने, ‘हामी सबैको लक्ष्य भनेको टोलीलाई बढी भन्दा बढी सफल बनाउन प्रयास गर्नेछौं ।’

उनले प्रशिक्षकले आफुलाई जसरी खेलाउन चाहन्छन् त्यसरी खेलाउन सक्ने बताए । ‘म खेलाडी भएकोले मैले मेहनत गर्ने हो,’उनले थपे, प्रशिक्षकले मलाई कहा कसरी खेलाउने निर्णय गर्ने हो । म प्लेइङमा सधै पर्छु भन्ने ग्यारेन्टी हुन्न । तर, मेरो प्रयास पहिलो रोजाईमा पर्नका लागि हुनेछ । म मेहनत गर्नेछु ।’

गत वर्ष अन्तर्राष्ट्रिय फुटबलबाट सन्यासको घोषणा गरेका अनिलले पहिलो पटक २००६ मा मनाङको जर्सी लगाएका थिए । त्यति बेला दुई र पछिल्लो आठ वर्ष गरि १० वर्ष उनले मनाङमा बिताए । लाजोङबाट फर्केपछि २०१० मा उनी पुनः मनाङमा आबद्ध भएका थिए ।