एजेन्सी – युरोपेली च्याम्पियन्स लिग अन्तर्गत केहिबेरमै इटालियन लिग च्याम्पियन युभेन्ट्सले स्पेनिस क्लब भ्यालेन्सियाको सामना गर्दैछ । भ्यालेन्सियाको घरेलु मैदानमा हुने खेलमा पोर्चुगिज स्टार क्रिस्टियानो रोनाल्डोले युभेन्ट्सका लागि च्याम्पियन्स लिगमा डेब्यु गर्दैछन् ।

घरेलु टोली भ्यालेन्सियालाई चोटको समस्याले सताएको छ । मिडफिल्डर जिओफ्री कोन्डोगबिया रियल बेटिसविरुद्ध चोट बोक्दै बाहिरिएका थिए भने फ्रान्सिस कोकेलिन र एजेकेल गराएको स्थिति पनि पूर्ण फिट छैनन् । यता युभेन्ट्सले पनि माटिया डे सिग्लियो र आन्द्रीए बार्जागलीलाई चोटका कारण खेलाउन सक्ने अवस्था छैन । डग्लस कोस्टा भने वैकल्पिक खेलाडीमा छन् । उनले लिग खेलमा सासुओलोविरुद्ध अभद्र व्यवहार देखाएपछि रातो कार्ड खाएका थिए ।

भ्यालेन्सियाले च्याम्पियन्स लिगको पछिल्लो ३ खेलमा कुनै गोल गर्न सकेको छैन । त्यसक्रममा क्लबले तीनै खेलमा पराजय भोगेको छ । युभेन्ट्सले च्याम्पियन्स लिगमा खेलेका पछिल्ला ४ खेलमा २ गोल भन्दा बढी भएका छन् । भ्यालेन्सियाले भने पछिल्ला ३ खेलमा हारेपनि २ गोलभन्दा बढी खाएको छैन । पछिल्लो लिग खेलमा भ्यालेन्सिया रियल बेटिससँग घरेलु मैदानमा गोलरहित बराबरीमा रोकिएको थियो । उक्त खेलमा भ्यालेन्सियाले आक्रमक रणनीति अपनाएपनि गोल गर्न सकेको थिएन ।

यता इटालियन लिग फुटबलमा चौथो खेल खेल्ने क्रममा रोनाल्डोले गोलको खाता खोलेका थिए । उनले सासुओलोविरुद्ध २-१ को जितमा दुवै गोल गरेका थिए । त्यसअघिका तीन खेलमा भने रोनाल्डो गोलविहिन नै रहेका थिए । च्याम्पियन्स लिग अगाडी उनले गोल गर्नुले पनि हौसला मिल्ने बताएका छन् । उनलाई पाउलो डिबाला र मारियो मान्जुकीचले आक्रमणमा साथ दिनेछन् । विंगर डग्लस कोस्टाको अनुपस्थितिले उनको प्रदर्शनमा केहि असर भने पर्नेछ ।

सुरुआती ११ :

भ्यालेन्सिया :

नेटो

भेजो – ग्याब्रिएल पाउलिस्टा – मुरील्लो  – जोसे गाया

कार्लोस सोलर – ड्यानी परेहो – ड्यानीएल वास -गोंकालो गवेदेस

मिसी बासुआइ- रोड्रीगो मोरेनो

युभेन्ट्स:

वोजचिएक सेचेज्नी

जोआओ क्यान्चेलो – लिओनार्डो बोनुची – जिओर्जियो किएलिनी – एलेक्स सान्ड्रो

सामी खेडिरा – मिरालेम प्यानिच – ब्लेस माटुइडी

बर्नार्डेसकी – मारियो मान्जुकीच – क्रिस्टियानो रोनाल्डो