म्याड्रिड (एजेन्सी)– साविक विजेता रियल म्याड्रिडले च्याम्पियन्स लिग समूह चरणमा आज रोमाको सामना गर्दैछ । ला लिगामा अपराजित रहेको रियलले च्याम्पियन्स लिगमा पनि त्यसैको निरन्तरताका लागि प्रयास गर्नेछ । उपाधि जोगाउने अभियानको सुरुवातका रुपमा रियलले आजबाट यात्रा प्रारम्भ गर्नेछ ।

यी दुई टोलीबीच महत्वपूर्ण तीन पक्ष

१. जिदान र रोनाल्डो विनाको रियल
क्रिस्टियानो रोनाल्डो र प्रशिक्षक जिनेदिन जिदानले गत सिजनको अन्त्यसँगै रियल छाडेका थिए । लगातार तीन पटक च्याम्पियन्स लिग उपाधि दिलाउनेमा प्रशिक्षकका रुपमा जिदान र खेलाडीका रुपमा रोनाल्डोको महत्वपूर्ण भूमिका रहेको थियो । यसपटक दुवैको साथ रियलमा हुने छैन ।
२. गोल वर्षा
यो सिजन ला लिगामा रियलले पाँच मध्ये एउटामात्र खेलमा क्लिनसिट राख्न सफल भएको छ । अर्को तिर रोमाले पनि ४ खेलमा ७ गोलको सामना गरिसकेको छ । तर, दुवै टोलीले लगातार गोल पनि गरिरहेका छन् । जसले आज हुने खेललाई थप रोमाञ्चक बनाउन सक्छ ।
१.रियल हावी

रियल र रोमाबीच यसअघि १० पटक प्रतिस्पर्धा भइसकेको छ । हेड टु हेडमा रियल माथि छ । रियलले ६ खेल जित्दा रोमाले ३ खेलको नतिजा मात्र आफ्नो पक्षमा पारेको छ । यी दुई टोलीबीच सन् २०१६ को अन्तिम १६ को प्रतिस्पर्धामा भेट भएको थियो । जसमा रोमालाई समग्रमा ४–० ले हराउँदै रियल अघि बढेको थियो ।