टुरीन (एजेन्सी) – इटालियन लिग अन्तर्गत आइतबार सासुओलोविरुद्ध खेलमा विपक्षी खेलाडीलाई थुकेका युभेन्ट्स विंगर डग्लस कोस्टालाई इटालियन लिगले ४ खेलको प्रतिबन्ध लगाउने भएको छ ।

कोस्टाके सासुओलोविरुद्ध खेलमा फेडेरिको डी फ्रान्सेसकोलाई लगातार फल हान्दै अन्त्यमा थुकेपछि रेफ्रीले रातो कार्ड दिएका थिए । सामान्यतया खेलभावना विपरित कार्य गरेपछि रेफ्रीले रातो कार्ड देखाउँदा ३ खेल प्रतिबन्ध लाग्ने नियम छ । तर लिगले उनले देखाएको व्यवहार अमानवीय रहेको भन्दै थप प्रतिबन्ध लगाएको हो । ब्राजिलका विंगर कोस्टाले पहिला कुइनो र टाउकोले हानेपछि फ्रान्सेसकोलाई थुकेका थिए । रेफ्रीले नदेखको उक्त घटना भीएआर रिभ्युबाट हेरेर रेफ्रीले रातो कार्ड फिएका थिए ।

खेल सकिएलगत्तै कोस्टाले सामाजिक संजालमार्फत माफी पनि मागेका थिए । उनले खेलको दौरान आफूले संयमता अपनाउन नसकेका करण उक्त घटना भएको बताए । उनले सम्पूर्ण खेलाडी, प्रशिक्षक र समर्थकसँग माफी पनि मागेका छन् । युभेन्ट्स प्रशिक्षक मासिमिलानो एलेग्रीले पनि यस घटनालाई क्लबले गम्भीरतापुर्वक लिएको र आवश्यक कारवाही अगाडी बढाउने बताएका थिए । उनले कोस्टालाई त्यस्तो नराम्रो कार्य गर्न उत्तेजित पारिएको हुनसक्ने आशंका पनि व्यक्त गरेका थिए ।

यता फ्रान्सेसकोले भने आफूले कुनै गलत काम नगरेको प्रष्ट पारेका छन् । ‘मलाई सामाजिक संजाल र संचार माध्यमबाट धेरै प्रश्न आइरहेको छ । मैले कुनै उक्साउने र उत्तेजित पर्ने कार्य गरेको छैन,’ उनले भने,’ म खेललाई माया गर्ने खेलाडी हुँ र यसको सम्मान गर्छु । मैले अन्य खेलाडीलाई गरेजस्तै सम्मान फिर्ता पाउने अपेक्षा गरेर मैदानमा उत्रने गर्दछु ।’