लिभरपुल (एजेन्सी) – च्याम्पियन्स लिगको समूह ‘सी’ अन्तर्गत लिगको पहिलो चरण खेलमा लिभरपुलले घरेलु मैदानमा पेरिस सेन्ट जर्मेन (पिएसजी) लाई निम्त्याउँदै छ । खेल नेपाली समयअनुसार रातको १२:४५ बजे हुनेछ ।

लिभरपुलले चोटका कारण महत्त्वपूर्ण तीन खेलाडी गुमाएको छ । विश्वकप फाइनल खेलेका डेजान लोभारेन तथा इंग्लिस मिडफिल्डरद्वय एडम लालाना र एल्केस अक्स्लेड चेम्बरलिन चोटका कारण खेलमा उपलब्ध हुने छैनन् । यसबाहेक रोबर्टो फिर्मिनोपनि शनिबार स्पर्सविरुद्ध खेलमा आँखामा चोट बोकेपछि खेल्ने-नखेल्ने टुङ्गो लागेको छैन । कप्तान जोर्डन हेन्डरसन स्पर्सविरुद्ध खेलमा बेन्चमा रहेका कारण यस खेलमा सुरुआती रोजाईमा खेल्ने अपेक्षा गरिएको छ ।

पीएसजीले पनि चोट र प्रतिबन्धका कारण मुख्य खेलाडीहरुको साथ नपाउने पक्का छ । डिफेन्डरद्वय लेभिन कुर्जावा र ड्यानी आल्भेस घाइते रहेका कारण टोलीसँग छैनन् । जियानलुइजी बुफोन र मारको भेर्राट्टी पछिल्लो सिजन च्याम्पियन्स लिगमा पाएको रातो कार्डका कारण खेल्न पाउने छैनन् । बुफोनको स्थानमा अल्फोन्स एरिओला खेल्नेछन् भने मिडफिल्डमा डिफेन्डर मार्किन्होस खेल्ने सम्भावना रहेको छ ।

पीएसजीले च्याम्पियन्स लिगमा खेलेका पछिल्लो तीनै खेलमा पराजय भोगेको छ । यसक्रममा पीएसजीले प्रत्यक खेलमा कम्तिमा २ गोल खाएको तथ्यांक छ । लिभरपुलले पनि च्याम्पियन्स लिगको पछिल्ला तीन खेलमा कम्तिमा २-२ गोल खाएको छ । दुवै टोलीले च्याम्पियन्स ल्गिमा गत सिजन भोगेको खराब अन्त्यलाई छाडेर यसपटक सुखद सुरुआत गर्ने सुरमा छन् ।

पीएसजी र लिभरपुलले हालसम्म कुनै औपचारिक खेलमा खेलेका छैनन् । लिग अन्तर्गत शनिबार लिभरपुलले टोटेनहमलाई २-१ ले पराजित गरेको थियो । पेरिसले पनि सेन्ट एटिएनलाई ४-० को फराकिलो अन्तरले परजित गरेको थियो । उक्त खेलमा नेयमार र एमबाप्पेले विश्राम पाएका कारण यस खेलमा दुवै उच्च फिटनेसमा हुनेछन् ।

सम्भावित सुरुआती ११ :

लिभरपुल:

एलिसन बेकर

एलेक्जेन्डर आर्नोल्ड – जो गोमेज – भर्जिल भान डाइक – एन्डी रोबर्टसन

जिओर्जिनियो वाइनाल्डम – जोर्डन हेन्डर्सन – नाबी केइटा

मोहमा सलाह – रोबर्टो फिर्मिनो – साडियो माने

पेरिस सेन्ट जर्मेन:

अल्फोन्स एरिओला

थोमस मुनिएर – थियागो सिल्भा – प्रेस्नेल किम्पेम्बे – जुआन बर्नाट

एड्रिएन राबीओट – मार्किन्होस

किलियन एमबाप्पे – नेयमार – एन्जल डी मारिया

एडिन्सन कभानी