साउथह्याम्टन र ब्राइटनको बराबरी

साउथह्याम्टन (एजेन्सी) – इंग्लिस प्रिमियर लिग फुटबलमा साउथह्याप्टन र ब्राइटन एन्ड होभ अल्वियोनले बराबरी खेल्दै अंक बाँडेका छन् । साउथह्याम्पटन घरेलु मैदानमा ब्राइटनसँग २–२ गोलको बराबरीमा रोकिएको हो ।

साउथह्याम्पटनका पिरे इमिली र ड्यानी इंग्सले गोल गरे । ब्राइटनका सेन डफी र ग्लेन मुरेले गोल गरे । घरेलु टोली साउथह्याम्पटनले सोमबार राति भएको खेलमा २–० को अग्रता जोगाउन नसक्दा बराबरीमा रोकिन पुगेको हो ।

३५औं मिनेटमा पिरे इमिलीले गोल गरेपछि साउथह्याम्पटनले पहिलो हाफमा १–० को अग्रता बनाएको थियो । ६५औं मिनेटमा ड्यानी इंग्सले पेनाल्टीमा गोल गरेपछि घरेलु टोली खेलमा २–० ले अघि बढेको थियो । तर, त्यसको २ मिनेटपछि सेन डफीले गोल गर्दै खेलमा फर्कने संकेत दिएका थिए । इन्जुरी समयमा ब्राइटनले पेनाल्टीमा गोल गर्दै खेललाई २–२ को बराबरीमा ल्याउदै महत्वपूर्ण एक अंका खोस्न सफल भयो । ब्राइटनका ग्लेन मुरेले गोल गर्न सफल भएका थिए ।

बराबरीपछि साउथह्याम्पटन ५ खेलबाट ५ अंकसहित १३औं तथा समान ५ अंक भएपनि ब्राइटन गोल अन्तरमा पछि पर्दै १४औं स्थानमा छ । पाँच खेलमा शतप्रतिशत जित निकाल्दै १५ अंक जोडेको चेल्सी लिगको शीर्ष स्थानमा छ ।