लन्डन (एजेन्सी)– इंग्ल्यान्ड एवंम् म्यानचेस्टर युनाइटेडका महान खेलाडी डेभिड बेकह्यामले पूर्व सहकर्मी ज्लाटान इब्राहिमोभिचलाई ५ सय गोल पुरा गरेकोमा बधाई दिएका छन् । पेरिस सेन्ट जर्मेन (पिएसजी ) मा सँगै खेलका इब्राहिमोभिचलाई जिस्काउँदै बेकह्यामले भनेका छन्,‘ ५ सय गोलले तिमीलाई साच्चै नै बुढो बनाएको छ । ’

फुटबलमा उत्कृष्ट खेलाडी मध्येका एकका रुपमा परिचय बनाएका ३६ वर्षे इब्राहिमोभिचले शनिबार मेजर लिग सकरमा टोरन्टोविरुद्ध गोल गर्दै ५ सय गोलको कोसेढुंगा पार गरेका थिए ।यद्दपी त्यो खेलमा उनको टोली एलए ग्यालेक्सी ५–३ ले पराजित भएको थियो ।

सक्रिय खेल जीवनमा रहेका मध्ये ५ सय गोल पुरा गर्ने इब्राहिमोभिच तेस्रो खेलाडी बनेका छन् । यसअघि युभेन्ट्सका क्रिस्टियानो रोनाल्डो र बार्सिलोनाका लियोनल मेस्सीले ५ सय गोल पुरा गरेका छन् ।

‘ज्लाटान ५ सय गोल पुरा गरेकामा म उनलाई बधाई दिन चाहन्छु ,’ बेकह्यामले भनेका छन्, राम्रो खेलाडी, उत्कृष्ट खेल जीवन र उच्चतम उपलब्धी । उनीसँगै र उनीविरुद्ध खेल्न पाउँदा मलाई गर्व छ । ५ सय गोलले तिमिलाई साच्चै बुढो बनाएको छ ।’

बेकह्यामले अगाडि थपे,‘बधाई छ साथी । तिमि अलिक लजालु छौं त्यसमा तिमिले अलिक मेहनत गर्नुपर्नेछ ।’ स्विडिस सुपर स्टार इब्राहिमोभिचले ९ वटा क्लबबाट व्यवासायिक फुटबल खेलेका थिए । जसमा आयक्स, इन्टर मिलान, एसी मिलान, युभेन्ट्स, बार्सिलोना, पिएसजी, युनाइटेड जस्ता क्लब छन् ।