काठमाडौं (हाम्रो खेलकुद)– एएफसी ए लाइसेन्स प्राप्त राजेन्द्र तामाङले यसपटकको लिगमा नेपाल एपिएफ क्लब सम्हाल्ने भएका छन् । एपिएफले तामाङलाई यसै महिना सुरु हुने सहिद स्मारक ए डिभिजन लिगलाई मध्यनजर गर्दै रुस्लान थ्री स्टार क्लबका पूर्व प्रशिक्षक तामाङलाई नियुक्त गरेको हो ।

उनले क्लबसँग भदौं १ गतेबाट लागु हुने गरि ६ महिनाको सम्झौता गरेको छन् । ‘सफल नतिजाको अपेक्षासहित क्लबले सम्झौता गरेको हो’ खेल जीवनको लामो समय लक्ष्मी हुन्डाई मनाङ मस्र्याङ्दी तामाङले हाम्रो खेलकुदसँग भने,‘ प्रशिक्षक चुनौतीका लागि सधै तयार रहनुपर्दछ । क्लबलाई सफलता दिलाउने उद्देश्यका साथ आएको छु ।’

ए डिभिजन लिग असोज १३ गते देखि सुरु हुँदैछ । मनाङमा लामो समय विताएका तामाङ २०६७ मा मच्छिन्द्र क्लबबाट खेल्दै खेल जीवनको अन्त्य गरेका थिए । एपिएफले विगतमा गर्दै आएको प्रशिक्षणमा आफुले केहि परिवर्तन ल्याएको उल्लेख गर्दै तामाङले भने,‘ प्रशिक्षणको तरिका परिवर्तन हुँदा खेलाडीलाई कठिन भयो । अब भने विस्तारै लय समात्दै छन् । यो सुखद पक्ष हो ।’

खेल जीवनकै दौरान स्कुलका विधार्थीलाई फुटबल सिकाउन थालेका तामाङले पछि पोखरामा आफ्नै एकेडेमी सञ्चालन गर्नुका साथै पोखराका अन्य टोलीलाईै प्रशिक्षण लिए । पछिल्लो पटक उनले ए डिभिजन टोली थ्री स्टारलाई प्रशिक्षण दिएका थिए ।

२०७२ मा थ्री स्टारले उनकै प्रशिक्षणमा राष्ट्रिय लिगको उपाधि जितेको थियो । त्यसयता नेपालमा ए डिभिजन वा राष्ट्रिय लिग भएको छैन । ए डिभिजन लिग पछिल्लो पटक २०७० मा आयोजना भएको थियो । एन्फाले आइतबार पत्रकार सम्मेलन गर्दै लिग विजेताले ५० लाख रुपैयाँ र सहभागिता टोलीले २० लाख रुपैयाँ तयारी वापत पाउने जानकारी गराएको छ ।