टुरीन (एजेन्सी) – क्रिस्टियानो रोनाल्डो आइतबार युभेन्ट्सका लागि लिगको चौथो खेलमा गोलको खाता खोलेका छन् । सुरुआती तीन खेलमा आक्रामक रुपमा निकै चनाखो देखिएपनि उनले गोल गर्न भने सकेका थिएनन् ।

लिगको सुरुआती खेलमा गोल गर्न नसक्दा रियल म्याड्रिड छाडेर युभेन्ट्स जाने उनको निर्णय पनि आलोचित रहँदै आएको थियो । तर आइतबार एकै खेलमा दुई गोल गर्दै उनले आलोचकहरुको मुखमा केहि हदसम्म बुझो लगाएका छन् । युभेन्ट्सले पनि १ सय मिलियन युरो खर्चेका खेलाडीबाट आउने खेलमा सोहि अनुसार प्रदर्शन पाउनेमा ढुक्क छ । रोनाल्डोलाई गोलको खाता खोल्न चार खेल कुर्नुपरे पनि उनले अब आउने खेलमा लयलाई निरन्तरता दिनेमा युभेका समर्थक पनि विश्वस्त छन् ।

३३ वर्षीय फरवार्डले युभेन्ट्सका लागि खेलको ५० औं मिनेटमा गोल गरेका थिए । उनले दोस्रो होल भने १५ मिनेटपछि नै गरे । उनले खेलमा ह्याट्रिक पनि पूरा गर्ने अवसर पाएका थिए तर सफल हुन सकेनन् । यस खेलमा दुई गोल गरेसँगै रोनाल्डोले ४ यस्तो कीर्तिमान कायम गरेका छन् जुन अन्य खेलाडीले बिरलै राख्न सक्छन् :

४. वर्तमान खेलाडीमध्ये सबैभन्दा बढी गोल

क्रिस्टियानो रोनाल्डो गोल मेसिन हुन् भन्नेमा सायदै दुविधा हुन्छ । ३३ वर्षको उमेरमा पनि रोनाल्डो एक युवा खेलाडी जत्तिकै प्रभावशाली देखिंदै आएका छन् । आइतबार युभेन्ट्सलाई लगातार चौथो जित दिलाउँदा उनले २ गोल गरे । हाल उनको क्लब र देशका लागि कुल गोल संख्या ६ सय ६० पुगेको छ । वर्तमान खेलिरहेका खेलाडीमा मेसी ६ सय २१ गोल सहित दोस्रो स्थानमा छन् । त्यसपछि सुचिमा रहेका ज्लाटन इब्राहिमोभिचले ५ सय गोल पुरा गरेका छन् ।

३. लिग फुटबलमा ४ सयौं गोल

रोनाल्डोलाई अन्य खेलाडीसँग तुलना गर्न च्याम्पियन्स लिगमा उनले गरेको गोललाई हेर्दा पनि पुग्छ । उनले पछिल्ला ६ सिजनमा युरोपको शीर्ष क्लब प्रतियोगिताको सर्वाधिक गोलकर्ताको उपाधि आफ्नो नाम गरेका छन् । यसका साथै उनले लिग फुटबलमा पनि आफ्नो गोल गर्ने शैलीमा कायम राखेका छन् । आइतबार गरेको दुई गोलसँगै उनले लिग फुटबलमा ४ सय गोलको आँकडा पूरा गरेका छन् । यसक्रममा उनले लिग फुटबलमा ५ सय १७ खेल मात्र खेलेका छन् । सन् २००९ देखि  रियल म्याड्रिडका लागि मात्र उनले ३ सय ११ गोल गरेका छन् ।

२. पहिलो गोलका लागि २७ प्रहार

सामान्यतया क्रिस्टियानो रोनाल्डो फरवार्डको भूमिकामा खेल्दा गोल नहुने सम्भावना कम हुन्छ । एक खेलमा नहुँदा अर्को खेलमा त उनले पक्कै गर्छन । रोनाल्डो फरवार्ड खेल्दा विपक्षी गोलरक्षकले बिरलै विश्राम लिने मौका पाउँछन् । यसअघिका लिग खेलमा रोनाल्डोको प्रहारलाई गोलरक्षकले विफल पार्दै आएका थिए । तर आइतबार रोनाल्डोले लिगमा गरेको २७ औं प्रहार भने गोलमा परिणत भयो । गत सिजन उनले २८ औं प्रहार गर्दा गोल गरेका थिए र उनको लागि सिजन सफल नै रहयो । यसपटक पनि सोहि क्रम दोहोरिने युभेन्ट्सको अपेक्षा हुनेछ ।

१. ४ सय लिग गोल गर्ने इतिहासका पाँचौ खेलाडी

रोनाल्डोले लिग फुटबलमा ४ सय गोल पुरा गर्दै फुटबल इतिहासकै सर्वकालीन महान खेलाडीको माझ आफूलाई उभ्याएका छन् । ३३ वर्षको उमेरमा उनले अझै धेरै फुटबल खेल्न बाँकी छ । युभेन्ट्ससँग नै उनको लामो सम्झौता रहेको छ । आउने दिनमा उनले यस सुचिमा रहेका अन्य खेलाडीलाई पनि उछिन्ने प्रबल सम्भावना छ ।