विल्वाओ (एजेन्सी) – स्पेनिस जाइन्ट रियाल म्याड्रिड एथ्लेटिको विल्वाओसँग बराबरीमा रोकिएको छ । रियाल विल्वाओसँग १–१ गोलको बराबरीमा रोकिएको हो ।

ला लिगा अन्तर्गत शनिबार राति विल्वाओको घरेलु मैदानमा भएको खेलमा रियाल एक गोलले पछि परेर बराबरी गर्न सफल भएको हो । विल्वाओका इकर मुनियनले गोल गरे । रियालका इस्कोले एक गोल फर्काए । इकरको गोलमा रियाल खेलको ३२औं मिनेटमा पछि परेको थियो ।

पहिलो हाफमा १–० ले पछि परेपछि रियालले आक्रमक फुटबल खेल्दै दोस्रो हाफमा गोल गर्न सफल भयो । ६३औं मिनेटमा इस्कोले ग्यारेथ बेलको पासमा बराबरी गोल गर्न सफल भएकका थिए । त्यसपछि पनि रियालको पटक–पटकको आक्रमण प्रयास गरेपनि एथ्लेटिको विल्वाओको बलियो रक्षापङ्ति तोड्न नसक्दा बराबरीमा रोकिन पुग्यो ।

बराबरीसँगै रियालले शीर्ष स्थानमा रहेको बार्सिलोनासँगको अंक दुरी बराबरी गर्ने मौका गुमाएको छ । रियालको ४ खेलबाट १० अंक छ । शीर्ष स्थानमा रहेको बार्सिलोनाको ४ खेलबाटै १२ अंक रहेको छ । रियाललाई बराबरीमा रोक्न सफल विल्वाओको ३ खेलबाट ५ अंकसहित चौथो स्थानमा छ ।

शनिबार राति नै बार्सिलोनाले रियल सोसिडाडमाथि २–१ को कठिन जित निकालेको थियो । अर्काे खेलमा एट्लेटिको मड्रिड इवारसँग १–१ गोलको बराबरीमा तथा भ्यालेन्सिया रियल बेटिसले गोलरहित बराबरी खेल्दै अंक बाँडे ।