लन्डन (एजेन्सी) –  इंग्लिस प्रिमियर लिग अन्तर्गत शनिबार म्यानचेस्टर युनाइटेडले वाटफर्डलाई २-१ ले पराजित गरेको छ । यससँगै वाटफर्डको शत प्रतिशत जितको नतिजा पनि तोडिएको छ ।

बेल्जियन फरवार्ड रोमेलु लुकाकुले ३५ औं मिनेटमा म्यानचेस्टर युनाइटेडलाई अग्रता दिलाएका थिए । त्यसको केहि मिनेटमा नै क्रिस स्मलीङले गोल गर्दै युनाइटेडको अग्रता दोब्बर पारे । वाटफर्ड कप्तान ट्रोए डिनीले ६५ औं मिनेटमा गोल फर्काउँदै खेलमा फर्कने आशा पनि देखाए । खेलको अन्तिम मिनेटमा मिडफिल्डर नेमान्जा माटीच दोहोरो पहेंलो कार्ड खाँदै बाहिरीएपछि युनाइटेड १० खेलाडीमा सिमित भएको थियो । उनले अब घरेलु प्रतियोगिताको अर्को खेल गुमाउनेछन् ।

युनाइटेडले पनि लिगको पाँचौ खेलमा तेस्रो जित दर्ता गर्यो । शीर्षस्थानका क्लबभन्दा ६ अंक पछाडी रहेको युनाइटेडका लागि खेलको अन्त्यतिर गोलरक्षक डेविड डे हेयाले राम्रो बचाउ गरे । उनकै प्रदर्शनमा युनाइटेडले अग्रता बचाएर राख्न सकेको थियो । खेल सकिएपछि गोलकर्ता स्मलीङले दर्शनीय गोल गर्न पाउँदा खुसि व्यक्त गरे ।

‘ हामी २-० ले अगाडी भएपछि मात्र खेलमा सुखको सास फेर्न पाइन्छ भन्ने थियो । हामीले सक्दो प्रयास गर्दै खेलमा अग्रता बचाउन सफल भयौं,’ आफ्नो गोलबारे बोल्दै उनले भने, ‘ म् सधैं त्यसैगरि बल आवोस भन्ने चाहन्थे । मेरो बलियो दायाँ खुट्टामा पारेको भलीलाई शक्तिशाली प्रहार गरें । नतिजा एकदम राम्रो आयो ।’