म्यानचेस्टर (एजेन्सी) – म्यानचेस्टर सिटीका प्रशिक्षक पेप ग्वार्डीओलाले जर्मनीका विंगर लेरोय सानेको खेल कौशलमाथि कहिल्यै शंका नगरेको बताएका छन् । उनै सानेले गोलको खाता खोलेपछि सिटीले शनिबार फुलहमलाई ३-० ले पराजित गरेको थियो ।

लिगमा पहिलो पटक सुरुआती रोजाइमा परेका सानेले १ मिनेट ३६ सेकन्डमै गोलको खाता खोल्दै साविक विजेतालाई नवप्रवेशीविरुद्ध अग्रता दिलाएका थिए । डेविड सिल्भाले २१ औं मिनेटमा अग्रता दोब्बर पार्दै सिटीलाई जिततर्फ अग्रसर गराए । रहिम स्टरलिङले दोस्रो हाफको सुरुआतमा गोल गर्दै जित पक्का गरे । लिगको सुरुआती ५ मध्ये ४ खेलमा जित दर्ता गर्दै सिटी शीर्ष स्थानमा रहेका क्लबभन्दा २ अंक पछाडी छ ।

ग्वार्डिओलाले खेलपछि २२ वर्षीय सानेको प्रदर्शन उत्कृष्ट रहेको बताए । ‘हामीले सानेको स्तरबारे कहिल्यै शंका गरेनौं । उनले गत सिजन पनि यस्तो प्रदर्शन गरेर हामीलाई सहयोग गरेका छन्, ‘ उनले भने, ‘कहिले काहीं २१/२२ वर्षको युवा उमेरमा केहि समस्या आउन सक्छ । त्यस्तो बेलामा व्यवसायिक खेलाडीको रुपमा उनले अगाडी बढ्नुपर्छ । उनले आज निकै राम्रो प्रदर्शन गरे ।’ साने राष्ट्रिय टोली र क्लब टोलीमा पनि बेलाबखत मैदान बाहिरका क्रियाकलापका कारण आलोचित हुँदै आएका छन् ।

ग्वार्डिओलाले सिटीले ३ गोल हानेपनि अझै बढी हुनसक्ने अवस्था रहेको बताए । ‘हामीले तीन गोलभन्दा बढी हान्ने थियौं । हामीले बनाएको अवसर उच्च स्तरको थियो,’ उनले थपे, ‘हामीले आक्रामक रणनीतिमा खेल्यौं । बल पाउनसाथ हामी आक्रमणका लागि अगाडी बढ्ने गर्यौं । हामीले गोल गर्ने सुवर्ण अवसरहरु खेर फालेपनि जित दर्ता गर्न भने सफल रहयौँ ।’