वेम्वली (एजेन्सी)–इंग्लिस प्रिमियर लिग फुटबलमा मर्सिसाइड क्लब लिभरपुलले आफ्नो अपराजित यात्रा कायमै राखेका छन् । प्रिमियर लिग अन्तर्गत शनिबार राति भएको खेलमा टोटनह्याम हस्टपरलाई २–१ ले पराजित गर्दै लिभरपुलले आफ्नो अपराजित यात्रा कायमै गरेको हो ।

टोटनह्यामको घरेलु मैदान वेम्वली स्टेडियममा भएको खेलमा लिभरपुललाई जिताउन जर्जिनो विजनल्डम र रोबर्टाे फिर्मिनोले गोल गरे । लिभरपुलले पहिलो र दोस्रो हाफमा गोल गर्न सफल भए । प्रतिस्पर्धात्मक बनेको खेलमा लिभरपुलले खेलका ३९औं मिनेटमा अग्रता बनाएको थियो ।

जर्जिनो विजनल्डमले कर्नरमा आएको बललाई गोलमा परिणत गर्दै लिभरपुल लाई पहिलो हाफमा १–० को अग्रता दिलाएका थिए । ५३औं मिनेटमा साडियो मानेले पासमा फिर्मिनोले गोल गरेपछि लिभरपुल २–० ले अघि बढेको थियो । घरेलु मेदानमा २–० ले पछि परेपछि टोटनह्यामले आक्रमक फुटबल खेल्दै इन्जुरी समयमा इरिक लमेलाले गोल गरेपनि खेलमा फर्कन निकै ढिला भैसकेको थियो ।

लिभरपुलको बलियो रक्षापङ्ति तोड्न नसक्दा पराजित हुन पुग्यो । यो सिजन खेलाडी अनुबन्धमा मोटो रकम खर्चिएको लिभरपुलले लिगमा लगातार पाँच जितसहित १५ अंक जोडेर शीर्ष स्थानमा रहेको छ । लिगमा टोटनह्यामको यो दोस्रो हार हो । टोटनह्यामको पाँच खेलबाट ९ अंक छ ।