म्याड्रिड (एजेन्सी) – स्पेनिस लिग अन्तर्गत शनिबार रियल सोसीडाडले घरेलु मैदानमा बार्सिलोनाको चुनौती स्वीकार्नेछ । खेल नेपाली समयअनुसार रातको ८ बजे ला लिगा फेसबुकमा प्रत्यक्ष प्रसारण हुनेछ ।

पछिल्लो सिजन लिग उपाधि जितेको बार्सिलोनाले यस सिजन पनि सोहि लयलाई कायम राखेको छ । शीर्ष स्थानमा रहेको बार्सिलोनाले सुरुआती तीनै खेलमा जित दर्ता गर्दै शत प्रतिशत जितको नतिजा हासिल गरेको छ । यसक्रममा टोलीले १२ गोल पनि गरेको छ । पछिल्ला खेलमा प्रभावशाली प्रदर्शन गरेका मिडफिल्डर ओस्मान डेम्बेले सुरुआती ११ मा मेसी र सुआरेजको साथ दिनेछन् ।

लिग अन्तर्गत पछिल्ला ३८ मध्ये ३७ खेलमा बार्सिलोना अपराजित छ । बार्सिलोनाले पछिल्ला १४ मध्ये १२ खेलमा कतिमा २ गोल गरेको छ । रियल सोसीडाडविरुद्ध खेलेका पछिल्ला ५ खेलमा बार्सिलोनाले जित दर्ता गरेको छ । तर सोसीडाडले घरेलु मैदानमा पछिल्ला ८ मध्ये ७ खेलमा विजयी भएको छ । सोसीडाडले यसै मैदानमा खेलेका पछिल्ला ४ खेलमा कम्तिमा ३ गोल गरेको तथ्यांक पनि छ ।

चोटको समस्याले ग्रस्त भएपनि सोसीडाडले कठिन चुनौती दिने टोली उतार्न सक्छ । अदनान जानुजाज, डीएगो लोरेन्टे, सान्ड्रो रामिरेज लगायतका खेलाडी चोटका कारण उपस्थित छैनन् । विलियन जोसे र राउल नाभास पनि पूर्ण फिट नभएकाले खेल्ने सम्भावना कम छ ।

सम्भावित सुरुआती ११ :

रियल सोसिडाड:
रुल्ली
जालुदा – एलुस्टोन्डो – मोरेनो – हर्नान्डेज
मेरिओनो – इलारामेन्डी – जुब्लेडिया
ओयाराजबाल – बौटिस्टा – जुआन्मी

बार्सिलोना :
टेर स्टेगन
सर्जी रोबर्टो – जेरार्ड पिके – स्यामुएल उम्टीटी – जोर्डी अल्बा
फिलिपे कोउटिन्हो – सर्जियो बुस्केट्स, इभान राकिटीच
लिओनेल मेसी – लुइस सुआरेज – ओस्मान डेम्बेले