काठमाडौं (हाम्रो खेलकुद)– राष्ट्रिय फुटबल टोलीका फरवार्ड विमल घर्तिमगरले जन्म दिनमा शुभकामना दिने सबैलाई आभार व्यक्त गरेका छन् । उनी शुक्रबार २१ वर्षमा प्रवेश गरेका हुन् ।

तस्बिर: विवेक सुवेदी/हाम्रो खेलकुद

जन्मदिनमा शुभकामना दिने सबै प्रति आभार व्यक्त गर्दै विमलले भने,‘मलाई जस्तै परिस्थितिमा पनि साथ दिदै आउनुभएको छ । उहाँहरु सबैलाई धन्यवाद । यसरी नै तपाईहरुको साथ पाइराखौं । जतिको मैले वर्थडे विस रेसपन्स गर्न सकिन हाम्रो खेलकुदमार्फत क्षमा माग्दै धन्यवाद दिन चाहन्छु ।’

उनले जन्मदिनको खुसी साफको उपाधि जितेर मनाउने लक्ष्य हुँदाहुँदै सेमिफाइनलमा रोकिनु पर्दा दुख व्यक्त गरे । ‘ सायद आजको दिन हामी फाइनलको तयारीमा हुनुपर्ने थियो । सेमिफाइनलमा अपेक्षित नतिजा हात पार्न नसक्दा फाइनल पुग्न बन्चित भयौं । हामीले सुधार गर्नुपर्ने पक्ष देखेका छौं र आउने दिनमा सफलता हात पर्न सुधार गर्दै अगाडी बढ्नेछौं ,’ विमलले भने । उनले बंगलादेशमा मैदानमा पुगेर हौसला बढाएका र नेपालमा रहेर टोलीको लागि समर्थन गरेका सम्पूर्ण दर्शकलाई धन्यवाद व्यक्त गरे ।

तस्बिर: विवेक सुवेदी/हाम्रो खेलकुद

विमलसहित नेपाली टोली बिहीबार मात्र बंगलादेशको ढाका जारी साफ च्याम्पियनसिपको सेमिफाइनल खेलेर फर्केको थियो । व्यक्तिगत रुपमा विमलले उच्च प्रदर्शन गरेको साफमा नेपाल सेमिफाइनल सम्म पुग्यो, तर फाइनल पुग्न फेरि पनि असफल भएको थियो । माल्दिभ्ससँग ३–० ले पराजित हुँदै नेपाली टोली च्याम्पियनसिपबाट बाहिरिएको थियो ।

विमलले भने यो पटक नेपाली टोलीका लागि सबैभन्दा बढी २ गोल गरेका थिए । त्यो सँगै विमलको अन्तर्राष्ट्रिय गोल संख्या ८ पुगेको छ । पाकिस्तानविरुद्ध २–१ को हारमा गोल गरेका विमलले आयोजक बंगलादेश २–० को जितमा फ्रिकिकमार्फत गोल गरेका थिए ।

उनले टोलीलाई साफ च्याम्पियनसिप उपाधि जिताउन नसकेकोमा समर्थकसँग माफी पनि मागेका छन् । ‘यो पटक हामीले समूह चरणमा उच्च प्रदर्शन गरेका थियौै । दुर्भाग्य सेमिफाइनलमा सोचे अनुरुप खेल्न सकेनौं,’ विमलले भने,‘ यो पटकको कोसिसमा पनि हामीलाई सफलता मिलेन त्यसमा साह्रै दुःख लागेको छ । तर, हामी समर्थकलाई विश्वास दिलाउन चाहन्छौं । आउने दिनमा हामी अवश्य पनि च्याम्पियन बनेर फर्केनेछौं । ’

पाकिस्तानविरुद्ध गोल गरेपछि विमल घर्तीमगर । तस्बिर: विवेक सुवेदी/हाम्रो खेलकुद