काठमाडौं (हाम्रो खेलकुद)– नेपाली राष्ट्रिय फुटबल टोलीका गोलकिपर किरण चेम्जोङले साफ च्याम्पियनसिपमा फेरि पनि सेमिफाइनलबाट अघि बढ्न नसकेकोमा दुःख मनाउ गरेका छन् । ढाकामा जारी साफ च्याम्पियनसिपको पहिलो सेमिफाइनलमा माल्दिभ्ससँग ३–० ले पराजित हुँदै नेपाली टोली प्रतियोगिताबाट बाहिरिएको थियो ।

अहिले सम्म चार पटक सेमिफाइनल खेलेको नेपाली टोलीका लागि पछिल्ला तीन सेमिफाइनलमा किरणले नै पोष्ट सम्हालेका थिए । ‘यसपटक हामीले जित्ने राम्रो सम्भावना थियो । तर दुर्भाग्य सेमिफाइनलबाट अघि बढ्न सकेनौं, ‘ बिहीबार स्वदेश फर्केपछि किरणले भने, ‘अब यस्तै सम्भावना फेरि बन्ला नबन्ला ।’

पाकिस्तानसँग २–१ ले पराजित हुँदै समूह चरणको सुरुवात गरेपनि त्यसपछिका दुई खेलमा नेपाली टोलीले उच्च प्रदर्शन गरेको थियो । भुटानविरुद्ध किरणको कप्तानीमा उत्रेको टोली ४–० ले विजयी भयो भने अर्को खेलमा बंगलादेशलाई २–० ले पराजित भएको थियो ।

समूह चरण सकिदा धेरैको अनुमान थियो, नेपाल सहजै फाइनल पुग्नेछ । तर, अपेक्षा अनुसार नेपाली टोली प्रदर्शन गर्न चुक्यो । नवौं मिनेटमा माल्दिभ्सले खेलमा अग्रता बनायो, त्यसलाई जोगाएन मात्र अन्त्य तिर थप दुई गोल गर्न सफल भयो । जसले नेपाल सेमिफाइनलमा अहिले सम्मकै ठूलो अन्तरमा पराजित भयो । पछिल्ला दुई संस्करण (सन् २०११ र २०१३) को सेमिफाइनलमा नेपाल समान १–० ले पराजित भएको थियो । १९९९ को सेमिफाइनलमा नेपाल २–१ ले पराजित भएको थियो ।

माल्दिभ्सबाट व्यावसायिक फुटबल खेल्दै आएका किरणले सेमिफाइनलमा आफ्नै सहकर्मीको दुई गोलको सामना गर्नुपरेको थियो । इब्राहिम वाहिद हसनले ८४ औं र ८६ औं मिनेटमा गोल गदै खेलमा फर्कने नेपालको सम्भावनालाई समाप्त पारेका थिए । किरण र इब्राहिम टिसी स्पोर्टस्बाट खेल्दै आएका छन् । माल्दिभ्स र भारतबीच शनिबार फाइनल हुनेछ ।