टुरीन (एजेन्सी) – युभेन्ट्स तथा अर्जेन्टिनी राष्ट्रिय टोलीका फरवार्ड पाउलो डिबालाले जनवरीमा क्लब छाड्ने पालेर्मोका मालिक माउरिजियो जाम्पारिनिले बताएका छन् । डिबालालाई अनुबन्धन गर्न स्पेन र इंग्ल्यान्डका क्लबहरुले प्रस्ताव गरेको पनि उनले खुलासा गरे ।

गत महिना इटालियन लिगको पहिलो खेलमा युभेन्ट्सले किएभोलाई ३-२ ले पराजित गर्दा सुरुआती रोजाईमा रहेका थिए । डिबालाले त्यसपछि लाजियोलाई २-० ले पराजित गरेको खेलमा भने खेल्न पाएनन् । तेस्रो खेलमा पार्मालाई २-१ ले हराउँदा डिबाला अन्तिम १० मिनेट मात्र मैदान प्रवेश गर्न पाए । २४ वर्षीय फरवार्डलाई अन्तर्राष्ट्रिय टोलीमा पनि उस्तै समस्या आइपरेको छ । विश्वकप टोलीमा नपरेका उनले पछिल्लो दुवै खेलमा सुरुआती रोजाईमा पर्न सकेनन् ।

सन् २०१५ मा पालेर्मोका मालिक जाम्पारिनिले नै डिबालाको युभेन्ट्स ट्रान्सफर सफल पारेका थिए । त्यसयता प्रशिक्षक मासिमिलानो एलेग्रीले डिबालाको उचित उपयोग गर्न नसकेको आरोप पनि उनले लगाए । जाम्पारिनिले डिबालालाई सकेसम्म चाँडो क्लब छाडेर अन्यत्र जान पनि सुझाव दिएका छन् । ‘डिबालालाई टोलीबाट बाहिर राख्दा मलाई निकै नरमाइलो लाग्छ,’ उनले भने, ‘उनी एलेग्रीकै कारण बेन्चमा छन् । डिबाला लिग जिताउन सक्ने खेलाडी हुन् र मैदानमा रहेर लिग जिताउन सकिन्छ ।’

‘ युभेन्ट्सलाई अहिले उनको आवश्यकता छैन । उचित रकम आएमा क्लबले उनलाई जान दिनुपर्छ । स्पेन र इंग्ल्यान्डका क्लब उनलाई अनुबन्धन गर्न तत्पर छन्,’ जाम्पारिनिले थपे, ‘ युभेन्ट्ससँग उत्कृष्ट खेलाडीको थुप्रो नै छ । तैपनि उनले खेल्न नपाउनु घाटाको विषय हो ।’

पछिल्लो सिजन बार्सिलोनाले डिबालालाई अनुबन्धन गर्ने प्रयास गरेको थियो । तर रियलले रोनाल्डोलाई युभेन्ट्स पठाएपछि उनको स्थानमा डिबाला ल्याउने हल्ला पनि चलेको थियो । यता इंग्ल्यान्डमा जोसे मोउरिन्होले डिबालालाई आफ्नो सूचिको पहिलो नम्बरमा राखेको पनि बुझिएको छ । यसका लागि टुरीन क्लबले युनाइटेडसँग पल पोग्बाको माग गर्ने सम्भवना पनि रहेको छ ।