मस्को (एजेन्सी) – रुसमा केहि महिनाअघि सम्पन्न विश्वकप फाइनल दौरान मैदान प्रवेश गरेर विरोध जनाएका ‘पुसी राएट’ का सदस्य पिटर भर्जिलभलाई गम्भीर अवस्थामा अस्पताल लागिएको छ । उनको पारीवारिक स्रोतका अनुसार उनलाई कसैले विष  खुवाएका कारण आकस्मिक अस्पताल लागिएको हो ।

विश्वकप फाइनलको मुद्दामा मंगलबार अदालतमा उपस्थित  भएपछि बिमारी परेका उनलाई अस्पताल लागिएको छ । उनीसंगै अदालत पुगेकी वेरोनिका निकुल्शिनाले पिटरले राम्रोसँग देख्न, बोल्न र हिड्न पनि छाडेको बताएकी छिन् । उनका अनुसार सुरुआती परिक्षणमा डाक्टरले खासै गम्भीर नदेखिएको बताएपनि केहिबेर पछि भने अस्पतालको विषालु पदार्थ रहेको बिमारी कक्षमा भर्ना गरे ।

मेडुजा नामक रसियाली संचार माध्यमले पिटरको पारीवारिक स्रोतसँग सम्पर्क गर्दै उनी आइसीयुमा रहेको जानकारी दिएको छ । स्रोतका अनुसार पिटर अहिले आँखाले मात्र संकेत गर्ने अवस्तामा छन् । मस्कोस्थित स्क्लिफोभोसकी अस्पतालमा रहेका सदस्यले पनि पिता गम्भीर अवस्थामा रहेको बताए । उनको स्वास्थ्य अवस्थाबारे भने यकिन नतिजा आउन सकेको छैन ।

पिटरले सन् २०१२ मा यस्तै किसिमको विरोध प्रदर्श गरेकी नदेझ्दा तोलोकोनिकोभासँग विवाह गरेका हुन् । त्यसबेला विरोध गरेको अभियोगमा नदेझ्दालाई २ वर्ष जेल सजाय भएको थियो । उनले ‘पिटरलाई विषालु खानेकुरा खुवाएर निकै गम्भीर अवस्थामा अस्पताल भर्ना गरिएको छ ,’ भन्दै ट्विट गरेकी छिन् । रायट समूहका अर्का सदस्य मारियाले पनि सोहि तथ्य रहेको ट्वीटमार्फत जनाएकी छिन् ।

पिटर क्यानाडाका नागरिक हुन् र उनले सन् २०१२ देखि रायट समूहको प्रवक्ताको भूमिका निर्वाह गर्दै आएका छन् । विश्वकप फाइनलमा विरोध गरेका कारण उनीहरुलाई १५ दिन जेल सजाय दिइएको थियो । रायट समूहले रुसमा मानवअधिकार हनन भएको विरोधमा उक्त कदम चालेको बताएका थिए ।