लन्डन (एजेन्सी)– विश्वकप विजेता तथा फ्रान्सका कप्तान ह्युगो लोरिसलाई २० महिना सवारि साधन चलाउनबाट प्रतिबन्ध लगाएको छ । मादक पदार्थ पिएर सवारी चलाएको आरोपमा लोरिसलाई २० महिने सवारि साधन चलाउनबाट प्रतिबन्ध लगाईएको हो ।

बेलायती मिडियाका अनुसार ३१ वर्षीय टोटनह्याम हटस्परका गोलरक्षक लोरिसले पछिल्लो महिना मादक पदार्थ पिएर सवारी चलाएपछि लन्डन केन्द्रिय पुलिसले पक्राउ गरेका थियो । जुलाईमा फ्रान्ससँग विश्वकप विजेता लोरिसलाई लन्डन केन्द्रिय पुलिसले ५० हजार पाउण्डको जरिवना पनि तिराएको छ । मादक पदार्थ सेवन गरेपछि लोरिसले १५ किलोमिटर प्रति घण्टा चलाउनु पर्ने बाटोमा ३० किलोमिटर प्रति घण्टाको गतिमा गाडी गुडाइरहेको पाइएको थियो ।

लोरिसले आफुलाई सुधार्नका लागि एक वर्ष आफ्नो गाडी चलाउन बन्द गर्नु पर्ने अदालतले आदेश दिएको छ । लोरिसले आफूले गरेको गल्तीका लागि माफी माग्दै प्रेस विज्ञप्ति जारी गरेका छन् । ‘ म परिवार, क्लब, सहकर्मी प्रशिक्षक र सम्पूर्ण समर्थकसामु माफी माग्न चाहन्छु । मादक पदार्थ पिएर गाडी चलाउनु भुल थियो । मैले यसको पूर्ण जिम्मेवारी लिँदै आगामी दिनमा गल्ति नदोहोर्याउने प्रण गर्छु,’ उनले भनेका छन् ।

क्लबले भने यस घटनालाई गम्भीर रुपमा लिएको र छिट्टै यसबारे आफ्नो धारणा प्रस्तुत गर्ने बताएको छ । सन् २०१२ मा ओलम्पिक लियोनाइसबाट स्पर्समा अनुबन्ध भएका लोरिसले पछिल्लो महिना पुलिसद्धारा लागेको आरोप पछि पनि माफी मागेका थिए । पक्राउ परेपछि म्यानचेस्टर युनाइटेडलाई ३-० ले पराजित गर्दाको खेलमा खेलेका उनले त्यसपछि भने चोटका कारण खेलेका छैनन् ।