म्यानचेस्टर (एजेन्सी) – स्पेनिस राष्ट्रिय टोलीका पूर्व मिडफिल्डर डेभिड सिल्भाले आठ बर्ष अघि म्यानचेस्टर सिटी आउनु जिवनकै सबैभन्दा उत्कृष्ट निर्णय भएको बताएका छन् । ३२ बर्षीय सिल्भा २४ बर्षको उमेर हुँदा सन् २०१० मा भ्यालेन्सियाबाट सिटीमा अनुबन्ध भएका थिए ।

अधिकांश स्पेनिस खेलाडीहरु बर्सिलोना वा रियल मड्रिडका लागि खेल्छन् । उनलाई पनि त्यसबेला रियल र बार्सिलोना दुवैले अनुबन्धन गर्ने इच्छा देखाएका थिए । तर, उनको सिटी जाने निर्णय जिवनको सहि निर्णय सावित भएको उनले बताएका छन् । ‘सिटी मलाई चाहन्थो, ’ सिल्भाले भने, ‘क्लबले डिसेम्बर देखि मलाई फोन गरिरहेको थियो । क्लब प्रतिनिधिले मलाई खेल्न आउनका लागि आग्रह गरिरहेका थिए । मैले सोचे, मलाई को चाहन्छ ? सिटी मलाई चाहन्छ त त्यहाँ म जाने छु ।’

उनले थपे, ‘फेरी म आफ्नो आमा बुबासँग बस्दै आएको थिए र आफ्नो ठाँउ छोड्दै अर्को ठाँउ जाने निर्णय गरेको थिए । जहाँ मेरो नयाँ जिवन जिउने समय थियो । तर, हाल थाहा भयो की मैले सहि कदम चालेको रहेछु ।’ सिल्भाले सिटीलाई तीन प्रिमियर लिग उपाधि जिताउनने क्रममा टोलीका लागि महत्वपुर्ण भुमिका निर्वाह गर्दै आएका छन् । सन् २०११ मा सिटीले एफए कप उपाधि जित्दै सुरुआत गरेको थियो । जो अहिले सम्म उनकोे क्लबको हाइलाईट हो ।

एक पटक विश्वकप र दुई पटक युरोपियन च्याम्पियनसिप जितेका सिल्भाले यस सिजन प्रिमियर लिगका तीन खेल खेल्दै एक गोल गरि सकेका छन् । उनले म्यानचेस्टर क्लबबाट सात प्रमुख ट्रफि जितिसकेका छन् । ‘एक पटक उपाधि जितेपछि तपाईं फेरी अर्को जित्नका लागि अगाडी बढ्नुहुन्छ । त्यो राम्रो कुरा हो, ’ उनले भने, ‘स्पेनिस राष्ट्रिय टिममा पनि यस्तै भएको छ । पहिलो उपाधि जितेपछि हाम्रो शैली नै परिवर्तन भयो र हामीले लगातार उपाधि जित हासिल गर्यौं । त्यसैले सिटीका लागि एफए कप एक सच्चा हाइलाइट हो ।’