ढाका (हाम्रो खेलकुद) – साफ च्याम्पियनसिपअन्तर्गत बुधबार सेमिफाईनलमा माल्दिभ्ससँग पराजित हुँदै नेपालको उपाधि जित्ने सपना पनि चकनाचुर भयो । प्रतियोगितामा गोलको खाता खोल्न नसकेको टोलीले नेपाललाई ३-० ले पराजित गर्दै फाइनल यात्रा तय गर्यो । यता सबैभन्दा बढी गोल गरेको नेपालले भने एक गोल पनि गर्न सकेन । कहाँ चुक्यो नेपाल ?

सेमिफाइनल खेलमा टोली छनोट:

माल्दिभ्सविरुद्धको खेलमा सुरुआती ११ लाई लिएर निकै आलोचना हुनु जायज थियो । अघिल्लो खेलमा पहिलो रोजाईमा परेर पनि राम्रो प्रदर्शन गर्न नसकेका निराजन खड्का र भरत खवासले फेरीपनि स्थान बनाए । त्यसअघि वैकल्पिक खेलाडीका रुपमा राम्रो प्रदर्शन गरेकै भरमा लगातार दुई खेल उनीहरुलाई विश्वास गर्ने प्रशिक्षकको रणनीति सफल भएन ।

फर्ममा रहेका विशाल राई र नवयुग श्रेष्ठलाई मौका नदिनु महँगो भयो । खेलदौरान पनि सुरुआत देखि फिक्का देखिएका निराजनलाई परिवर्तन गर्न प्रशिक्षक बालगोपाल महर्जनले धेरै समय लिए । भरत खवासले खेलको पहिलो हाफमा पाएको सुवर्ण अवसर गुमाउनु खेलको टर्निङ पोइन्ट बन्यो ।

माल्दिभ्सलाई कमजोर आँक्नु :

माल्दिभ्स र नेपालको इतिहास जस्तोसुकै भएपनि प्रतियोगितामा स्थिति फरक थियो । अहिलेसम्म नेपालले पराजित गर्न नसकेको टोली हो माल्दिभ्स । भनिन्छ कहिलेकाहिँ इतिहासले वर्तमान फर्मलाई पनि असर पार्छ र सेमिफाइनल खेलमा त्यस्तै भयो । माल्दिभ्सका कप्तान अक्रमले नवौं मिनेटमा गरेको गोलबाट नै माल्दिभ्स टोली आत्मविश्वासी देखियो । रक्षात्मक रुपमा बलियो माल्दिभ्स आक्रमणमा पनि समस्या दिइरहेको थियो । जबकी खेलअघि फाइनलबारे बोलेका नेपाली खेलाडी आक्रमणमा फितलो र रक्षात्मक रुपमा पनि कमजोर देखिए ।

प्रतिकुल मौसमको कमजोर तयारी:

खेलदौरान वर्षा र चट्याङका कारण पहिलो हाफको २७ मिनेटपछि खेल आधा घण्टा रोकियो । नेपाली खेलाडी भिजेको लुगामा पूरा समय बस्न बाध्य भए । उनीहरुले प्रयोग गर्ने बुट पनि हिलाम्मे मैदानको लागि उपयुक्त नभएको खेलमा चिप्लिएका दृश्यले प्रष्ट बताउँथ्यो । यता माल्दिभ्सले भने मध्यान्तरपछि नै जर्सी पुरै परिवर्तन गरेको थियो भने हिलाम्मे मैदानलाई उपयुक्त बुट लगाएको थियो । हिलोले भिजेको जर्सीमा खेल्न अप्ठेरो हुन्छ नै, फ्रिकिक हान्दा खेलाडी चिप्लिएको दृश्य लाजमर्दो नै थियो ।

डिफेन्सको खराब दिन:

नेपाली डिफेन्स माल्दिभ्सविरुद्ध खेलअघि उच्च लयमा थियो । लगातार दुई क्लिनसिटका कारण मनोबल उच्च थियो । तर फ्रिकिक गोलमा पछाडी परेपछि आक्रमणले दबाब झेल्न नसक्दा डिफेन्सले पनि हतारिएको देखियो । संयमित हुनुपर्ने नेपाली डिफेन्स आक्रमणमा जाने हतारमा गल्ति गरेको देखिन्थ्यो । मैदानका कारण पनि केहि गल्ति हुँदा माल्दिभ्सले फाइदा उठाउन सक्यो । अन्तिमतिर गोल थप्ने धुनमा हतारिएको डिफेन्स आफ्नै गल्तीले ३-० ले पराजित हुन पुग्यो ।

प्रतियोगितामा अन्य पक्ष पनि रहयो जहाँ नेपाली टोलीले सुधार गर्न सक्थ्यो । नेपालमा गरेको तयारी अनुसार खेल्न नसक्नु र उपलब्ध खेलाडीको प्रयोग राम्रोसँग नहुनु पनि हारका कारण बने । केहि उपयुक्त खेलाडी नेपालमै रहनुले पनि टोलीको प्रदर्शनमा असर परेको थियो ।