प्रकाश तिमल्सिना
ढाका – साफ च्याम्पियनसिपको सेमिफाइनलबाट बारिहएको नेपाली फुटबल टोली बिहीबार स्वदेश फर्कने भएको छ । बिमान बंगलादेशबाट नेपाली टोली नेपाली समय अनुसार बिहान १०ः१५ बजे ढाकाबाट काठमाडौंका लागि उड्नेछ । ढाकाको बंगबन्धु नेसनल स्टेडियममा बुधबार माल्दिभ्ससँग ३–० ले पराजित भएसँगै नेपाली टोली च्याम्पियनसिपबाट बाहिरिएको हो ।

निराशाजनक सुरुवात त्यसपछिका दुई खेलमा उच्च प्रदर्शन र सेमिफाइनलमा फेरि पनि निराशाजनक प्रदर्शनसहित नेपाली टोलीको यसपटकको यात्रा अन्त्य भएको थियो । समूह चरणको पहिलो खेलमा २–१ ले पराजित भएपछि नेपाली टोलीको चर्को आलोचना भएको थियो । प्रशिक्षक बालगोपाल महर्जनको रणनीतिमा पनि धेरैले शंका गरे ।

तर, भुटानसँगको दोस्रो खेलमा नेपाल लयमा देखियो । ४–० को जितमा ४ अलग अलग खेलाडी गोल गरे । सेमिफाइनल प्रवेशका लागि जितको विकल्प नरहेको बंगलादेशविरुद्धको खेलमा नेपालले २–० को जित निकाल्यो । त्यति बेलामा सम्म बंगलादेशका अधिकांश खेल पत्रकारले च्याम्पियनको मुख्य दाबेदारका मानेका थिए ।

अर्को तर्फ माल्दिभ्सको सुरुवात निकै कमजोर फितलो थियो । श्रीलंकासँग गोलरहित बराबरीमा खेलको माल्दिभ्स भारतसँग २–० ले पराजित भयो । श्रीलंकासँग अंक र गोलअन्तर पनि बराबरी रहँदा माल्दिभ्स भाग्यशाली बन्दै टसका आधारमा सेमिफाइनल पुग्न सफल रह्यो । सेमिफाइनलमा माल्दिभ्सले भाग्यको साथ खोजेन ।

नेपालमाथि सुरुवातबाट हावी रह्यो र जितको हकदार बन्यो । नवौं मिनेट कप्तान अक्रम अब्दुल घानीको गोलबाट अग्रता बनाउन सफल रह्यो । वर्षा र चट्याङको खतरामा २७ औं मिनेटमा खेल रोकियो । झन्डै आधा रोकिएको खेल पुनः सुरु हुँदा पनि नेपाल खेलमा फर्कने धेरैको अपेक्षा थियो । तर, त्यस्तो भएन । एक रुपताको प्रदर्शन गर्नबाट चुक्दै आएको नेपाल फेरि एक पटक सेमिफाइनलमा निराश बन्न पुग्यो ।

खेलको अन्त्यतिर इब्राहिम हसन वाहिले २ गोल गरेसँगै नेपाली टोलीले यात्राको अन्त्य गर्यो । सन् १९९३ मा सार्क गोल्ड कपका नामबाट सुरु भएको च्याम्पियनसिपको १२ औं संस्करण सम्म आइपुग्दा नेपाल मात्र ४ पटक सेमिफाइनल पुग्न सफल भएको छ । तर, त्यसबाट अघि बढ्ने अवसरबाट फेरि पनि नेपाली चुक्दै घर फर्केको छ । नेपालले साफ च्याम्पियनसिप जित्ने सपना कम्तीमा अहिलेका लागि सपनामा मै सिमित भएको छ ।