प्रकाश तिमल्सिना

ढाका – हरेक पटक दाबेदारका रुपमा हेरिने नेपाली फुटबल टोली साफ च्याम्यिनसिप (साफ सुजुकी कप) को फाइनल पुग्न फेरि असफल भएको छ । ढाकामा जारी साफ च्याम्पियनसिपको पहिलो सेमिफाइनलमा माल्दिभ्ससँग ३–० ले पराजित हुँदै नेपाल प्रतियोगिताबाट बाहिरिएको छ । १९ वर्षको बीच चौथो पटक सेमिफाइनल खेल्दा नेपाललाई एक पटक पनि सफलता मिल्न सकेको छैन ।

अघिल्ला तीन सेमिफाइनलमा जस्तै खेलमा पुनरागमन गर्न नसक्दै नेपाली टोली च्याम्पियनसिपबाट बाहिरिएको छ । नवौं मिनेटमा माल्दिभ्सका कप्तान अक्रम अब्दुल घानीको फ्रि किक गोलमा नेपाल पछि परेको थियो । पेनाल्टी बक्सको केहि बाहिरबाट उनले गरेको प्रहारलाई रोक्न रक्षक सुमन अर्याल र गोलपिकर किरण चेम्जोङ पूर्ण रुपमा असफल भएका थिए । खेलको अन्ततिर इब्राहिम हसान वाहिदले २ गोल गर्दै नेपालको खेलमा फर्कने सम्भावना चकनाचुर पारेका थिए ।

नेपाली रक्षकहरुले बल क्लियर गर्न नसकेको फाइदा उठाउँदै उनले ८४ औं र ८७ औं मिनेटमा गोल गरे । दशरथ रंगशालामा हिलो मैदान हुँदा पनि अन्तर्राष्ट्रिय प्रतियोगितामा उच्च प्रदर्शन गर्ने गरेको नेपालले बंगबन्धु रंगशालामा भने त्यो लय देखाउन सकेन । हरेक पटक नेपाली रक्षक विट भएका थिए । केहि राम्रा मौका पाउँदा पनि टोली खेलमा फर्कन सकेन ।

यसअघि तीनै सेमिफाइनलमा नेपाल पछि परेर खेलमा फर्कन असफल भएको थियो । च्याम्पियनसिपका पछिल्ला दुई सेमिफाइनलमा जस्तै नेपालले यसपटक पनि गोल गर्न सकेन । सन् १९९९ को सेमिफाइनलमा नेपाल बंगलादेशसँग २–१ ले पराजित भएको थियो । नेपालले ६२ औं मिनेटमा २ गोल गरेपछि नेपालले ७४ औं मिनेटमा गोल फर्काएको थियो ।

नेपालका लागि अहिलेका नेपाली टोलीका प्रशिक्षक बाल गोपाल महर्जनले गोल गरेका थिए । त्यसपछि २०११ र २०१३ को सेमिफाइनलमा नेपाल दुवै पटक अफगानिस्तानसँग १–० ले पराजित भएको थियो । २०११ को सेमिफाइनलमा थप समयमा (१११ मिनेट) मिनेटमा गोल खाएको नेपालले २०१३ मा काठमाडौंमा भएको च्याम्पियनसिपमा ११ औं मिनेटमा गोलको सामना गरेको थियो ।

सेमिफाइनलमा पछि परेको इतिहासलाई बदल्न नसेपछि नेपाल फेरि एक पटक निराश भएर स्वदेश फर्कने भएका छ । आजै अर्को सेमिफाइनलमा भारत र पाकिस्तान खेल्दै छन् ।