न्यूयोर्क (एजेन्सी) – अन्तर्राष्ट्रिय मैत्रीपूर्ण खेलमा ब्राजिल र एल साल्भाडोर खेल्दै छन् । नेपाली समयअनुसार बुधबार बिहान ६:१५ बजे हुने खेलमा ब्राजिलका प्रशिक्षक टिटेले बलियो टोली उतार्ने अपेक्षा गरिएको छ ।

विश्वकपपछि अन्य टोलीले आफ्नो ठूला खेलाडीलै विश्राम दिएपनि ब्राजिलले भने रोबर्टो फिर्मिनो, नेयमार, फिलिपे कोउटिन्हो, क्यसेमिरो र डग्लस कोस्टालगायतका खेलाडीलाई टोलीमा समेटेको छ । यसअघि अमेरिका विरुद्ध भएको खेलमा नेयमार र कोउटिन्होको गोलमा ब्राजिलले २-० को जित दर्ता गरेको थियो । एल साल्भाडोरले भने अघिल्लो खेलमा मोन्टसेराटलाई २-१ ले हराएको थियो ।

एल साल्भाडोर तुलनात्मक रुपमा निकै कमजोर टोली भएपनि ब्राजिलले बलियो टोली नै मैदानमा उतार्ने सम्भावना रहेको छ । विश्वकपको खराब प्रदर्शनपछि टिटे टोलीलाई पुन लयमा ल्याउन प्रयास गरिरहेका छन् । केहि स्टार नाम बेन्चमा भएपनि ब्राजिलको टोली निकै बलियो हुनेछ ।

यो ब्राजिल र एल साल्भाडोर बीच हालसम्मको तेस्रो भिडन्त हो । यसअघि दुवै खेलमा ब्राजिलले २-० को जित दर्ता गरेको छ । ब्राजिलले पछिल्ला ६ मैत्रीपूर्ण खेलमा कुनै गोल खाएको छैन । त्यसमध्य ४ खेल २-० को अन्तरले आफ्नो पक्षमा परेको छ । एल साल्भाडोरले दक्षिण अमेरिकी प्रतिद्वन्द्वीविरुद्ध खेलेका ९ खेलमा सबै खेल हारेको छ ।