प्रकाश तिमल्सिना

ढाका– नेपाली फुटबल टोलीका कप्तान विराज महर्जनका लागि यसपटक साफ सुजुकी कप (साफ च्याम्पियनसिप) को भ्रमण व्यक्तिगत रुपमा उनका लागि यादगार बनिसकेको छ । तर, उनले देखेको अर्को सपना भने पुरा हुन बाँकी छ ।

राष्ट्रिय टोलीलाई साफ च्याम्पियनसिप जिताउने उनको लक्ष्यमा पुग्न नेपाल दुई खेल टाढा छ । ढाकाको बंगबन्धु राष्ट्रिय स्टेडियममा नेपालले ३ः४५ मा माल्दिभ्ससँग प्रतिस्पर्धा गर्दैछ । विराज यहि प्रतियोगिताका दौरान राष्ट्रिय टोलीबाट सर्वाधिक खेल खेल्ने खेलाडी बनेका छन् । दोस्रो खेलमा भुटानविरुद्ध दोस्रो हाफमा परिवर्तित खेलाडीका रुपमा उनले नेपालका लागि सर्वाधिक ६९ क्याप जित्ने खेलाडी बनेका थिए । ६८ क्याप पूर्व कप्तान राजु शाक्यको नाममा रहेको छ । बंगलादेशको खेलमा भने विराज पहिलो रोजाइमा थिएनन् ।

विराजले आफ्नो कप्तानीमा नेपाललाई साफ च्याम्पियनसिप जिताए भने उनी नेपालका सबैभन्दा सफल कप्तान बन्ने छन् । सन् १९९३ यता नेपाली टोली दक्षिण एसियाली स्तरको सिनियर टोलीको च्याम्पियन बनेको छैन । साफ जित्न सके यो १९९३ पछि नेपाली फुटबलका लागि ठूलो उपाधि हुनेछ । त्यसका वावजुद विराजकै कप्तानीमा नेपालले २०७२ को माघ ढाकामा बन्ध बन्धुगोल्ड कप जितेको थियो । फाइनलमा उनीसहित ३ सिनियर खेलाडी सम्मिलित १२ औं दक्षिण एसियलाी खेलकुदमा भारतलाई हराएर यू २३ मा स्वर्ण पदक जितेको थियो । २०७३ को कार्तिकमा नेपाली टोलीले सोलिडारिटी कप जित्दा अनिल गुरुङ कप्तानका रुपमा रहेपनि मैदानमा भने विराजले नै टोलीको कप्तानी गरेका थिए ।

खेलअघिको पत्रकार सम्मेलनमा बोल्दै कप्तान महर्जनले नेपाली टोली माल्दिभ्सविरुद्धको खेलका लागि तयार रहेको बताएका हुन् । ‘हामी माल्दिभ्सविरुद्धको खेलमा आत्मविश्वासी भएर खेल्नेछों । यसको अर्थ बढी आत्मविश्वासी भएर भन्ने होइन । उनीहरु कमजोर प्रतिद्धन्द्धी हैन ’ विराजले भने, ‘टिमले पछिल्ला खेलहरुमा निकै राम्रो खेलिरहेका छन् । उनीहरुमा आत्मविश्वास बढिरहेको छ । यो टिमको लागि खुशीको कुरा हो । हामी जितकै लागि खेल्नेछौं । माल्दिभ्सलाई हराउँदै सबै नेपालीलाई खुसी दिने प्रयास गर्नेछौं । ’