पोर्ट-अ-प्रिन्स (एजेन्सी) – हाइटीको राष्ट्रिय फुटबल टोलीले कन्काकाफ नेसन्स लिग छनोट अन्तर्गत कीर्तिमानी जित दर्ता गर्ने क्रममा सिन्ट मार्टेनको राष्ट्रिय टोलीलाई १३-० ले पराजित गरेको छ । पहिलो हाफमा ५-० ले अगाडी रहेको हाइटीले दोस्रो हाफमा ८ गोल थपेको थियो ।

हाइटीको राजधानी पोर्ट-अ-प्रिन्सस्थित सिल्भियो कातोर रंगशालामा हाइटीका लागि फरवार्ड डकेन्स नाजोनले ५ गोल गरे । डिफेन्डर अर्केस कार्लेन्सले ११ औं मिनेटमा पहिलो गोल गर्दै सुरु भएको गोल वर्षा अन्तिम मिनेटसम्म चालेको थियो । हाइटीका लागि फ्रान्जी पेरटले दुई गोल थप्दा सोनी मुस्तीभार, हेरोल्ड चार्ल्स, जेफ लुइस र डेरीक एटिएनले १-१ गोल गरे । अर्को एक गोल भने डिआरो फोर्सिथले आत्मघाती गोल गरेका थिए ।

कन्काकाफ नेसन्स लिग छनोटमा ३४ टोलीको सहभागिता रहेको छ । सहभागी टोलीलाई ४ पटमा विभाजन गरेर ४ चरणको खेल तालिका सार्वजनिक गरिएको छ । हाइटीले पहिलो चरणको खेलमा सहज जित निकालेको हो । अर्को खेलमाक्युबाले पनि टर्क्स आइल्यान्डलाई ११-० ले पराजित गर्दै सुखद सुरुआत गर्यो । क्यानाडाले यूएस भर्जिन आइल्यान्डलाई ८-० ले हराउँदा फ्रेन्च गुयानाले एन्गिलालाई ५-० ले पन्छायो । डोमिनिकन रिपब्लिकले पनि बोनाएरलाई ५-० ले नै पराजित गर्यो ।