मेक्सिको (एजेन्सी) – अर्जेन्टिनाका पूर्व फुटबलर तथा प्रशिक्षक डिएगो म्याराडोना मेक्सिकोको दोस्रो श्रेणीको क्लब डोराडोस डे सिनालोआको प्रशिक्षक पदमा नियुक्त भएका छन् । यद्यपी यो क्लब मेक्सिकोमा लागुपदार्थका लागि कुख्यात मानिने ठाउँमा अवस्थित छ ।

जारी सिजनको सुरुआती ६ खेलसम्म पनि जित दर्ता गर्न नसकेको डोराडोस लिग तालिकामा १३ औं स्थानमा छ । लिगअवधिमा दुई गोल मात्र गर्न सकेको यस क्लबलाई म्याराडोनाले माथिल्लो श्रेणीमा उकाल्ने प्रयास गर्ने छन् । ‘ अब हामीले मिहिनेत गर्नुछ । सबै एकतृत भएर अगाडी बढ्न जरुरी छ,’ ५७ वर्षीय म्याराडोनाले भने, ‘ मेरो लक्ष्य भनेको टोलीलाई माथिल्लो श्रेणीमा लग्नु हो । यसका लागि सबैले आफ्नो स्थानबाट सक्दो सहयोग गर्नुपर्छ ।’

क्लबले म्याराडोनाको आगमनका लागि एअरपोर्टमा विशेष व्यवस्था गरेपनि उनको आगमनसँगै दर्शक र मिडियाले उनलाई घेरेका थिए । ‘ मलाई मेक्सिकोको फुटबल सधैं रमाइलो लाग्थ्यो । म सधैं यहाँ आउन चाहन्थे र अहिले आइपुगेको छु । यहाँ मैले पाएको स्वागतले अझै राम्रो गर्न उत्साहित बनाएको छ,’ उनले भने । म्याराडोनाको पहिलो खेल अर्को साता क्याफेतालेरोसविरुद्ध हुनेछ ।

यसअघि म्यानचेस्टर सिटीका प्रशिक्षक पेप गुआर्डीओलाले सन् २००६ मा डोराडोसबाट खेलेका थिए । म्याराडोनाको औपचारिक रुपमा प्रशिक्षक घोषणा र प्रशिक्षण सोमबार हुनेछ । म्याराडोना विमानस्थलमा क्लबको औपचारिक क्याप र मफलरमा देखिएका थिए । क्लबले ट्वीटरमा म्याराडोनालाई स्वागत गर्ने क्रममा, ‘ म्याराडोना घर फर्किएका छन्’, ‘ सधैं साथ रहने छौं ‘, लगायतका नारा लेखेको थियो ।

अन्तर्राष्ट्रिय फुटबलमा खेलाडीको रुपमा पृथक पहिचान बनाएका म्याराडोना प्रशिक्षकका रुपमा भने सफल हुन सकेनन । उनले अर्जेन्टिनाको राष्ट्रिय टोलीलाई विश्वकपमा पनि हेरेका थिए । उनकै कप्तानीमा अर्जेन्टिनाले सन् १९८६ को विश्वकप उपाधि जितेको थियो । रुसमा भएको विश्वकपमा पनि म्याराडोना टोलीको समर्थन गर्न रंगशालामा पुगेका थिए । उनले त्यहाँ गरेको व्यवहारको चर्को आलोचना भएको थियो ।